ORANJESTAD – Durante su bishita na Hulanda pa varios reunion, Prome Minister Evelyn Wever-Croes tabata presente na Kabinet di Gevolmachtigde Minister di Aruba na Den Haag, Arubahuis, pa instalacion di e prome Studentenraad pa Aruba na Hulanda.
Prome Minister a indica cu e idea pa cu e proyecto aki a cuminsa 1 aña pasa durante un reunion cu el a atende cu e studiantenan, na unda nan a bin cu e recomendacion aki dilanti. Awor un aña despues Gobierno di Aruba a logra cumpli cu e studiantenan aki instalando asina e “Studentenraad” cu tanto nan a pidi p’e.
Pa haci e proyecto aki uno exitoso, a busca studiantenan di Aruba cu ta studiando na Hulanda den diferente region pa bira miembro di e Studentenraad. Nan tarea como miembro ta pa representa e studiantenan na Hulanda y pa trece nan puntonan di preocupacion y/of recomendacionnan dilanti. Tambe e studiantenan aki lo tin e derecho di “inspraak”, esaki kiermeen cu nan lo tin algo di bisa den e maneho general cu Gobierno di Aruba ta aplica.
Hunto cu nan mentor di cada region, e studiantenan aki lo ta encarga pa inventarisa kico ta e necesidadnan cu tin y pa bin cu proposicionnan pa cu solucion. E meta di esaki ta pa Gobierno por logra atende e necesidadnan aki pa asina mehora e calidad di bida di cada studiante di Aruba na Hulanda. Esaki sigur lo yuda cada studiante pa asina nan por ta exitoso den nan estudio.
“Mi kier gradici Minister Plenipotenciario sr. Ady Thijsen pa a habri e posibilidad aki, y tambe Directora di Arubahuis sra. Joselin Croes cu ta un motor tras di e proyecto aki. Mi tabata presente y por a scucha cada un di e studiantenan nan vision y motivacion pakico nan a uni nan mas pa ta parti di e “Studentenraad”. Mi ta hopi orguyoso di cada un di nan pasobra nan ta studiantenan cu ta dispuesto pa duna di nan mes pa asina yuda e otro studiantenan. Nan ta sumamente activo den comunidad y tin un entusiasmo enorme pa yuda otro. Mi tin tur confiansa den e proyecto aki. Awor cu e “Studentenraad ta instala, Gobierno ta en espera di e prome recomendacionnan pronto pa asina por cuminsa traha riba nan pa yuda tur e studiantenan na Hulanda”, Prome Minister a expresa.
