Manisfestacion Cultural:
Diabierna anochi pueblo di Aruba a cuminsa celebra ‘Dia di Betico’ cu un bunita Manisfestacion Cultural riba Plaza Betico. Na e ocasion aki Minister Xiomara Maduro a diriji algun palabra.
Ta un honor pa mi pa awe nochi diriji algun palabra na e Manisfestacion Cultural aki, unda nos ta bini hunto pa cuminsa celebra e fecha natal di un persona sumamente importante pa historia di Pais Aruba, Gilberto François “Betico” Croes, e ‘Libertador di Pais Aruba’. Un lider cu un amor grandi pa su pueblo, un visionario cu a dedica su bida pa un miho futuro pa Aruba.
25 januari ta un Dia pa nos rindi honor na Betico Croes y su logronan cu lo keda semper graba den historia di nos Pais. Durante e lucha, Betico a enfrenta hopi obstaculo y tambe mester haci hopi sacrificio personal. Manera un dicho popular cu e sa uza ta ‘No tin lucha sin sacrificio y no tin sacrificio sin gloria’.
Den bida, si bo kier algo, e no ta bin di mes. Tin un trayecto cu bo mester cana pa yega na bo meta. Bo mester planea, inverti tempo, hopi biaha bo mester di un team pa yuda bo y cu hopi pasenshi, determinacion, perseverancia, fe y trahando duro bo ta logra bo meta. Mesuncos a sosode cu Betico. For di momento cu ela dicidi pa lucha pa un Aruba autonomo ela pasa den e proceso aki. Pero tabatin un diferencia, Betico no a bay e lucha aki pa su mes, ela bay e lucha aki pa tur Arubiano.
Betico por a scohe otro ora cosnan tabata bira dificil, pero ela entrega su energia, tempo y su bida pa su pueblo. E tabata dispuesto pa haci sacrificionan personal pa por yega na su causa, un Aruba liber y pa nos ta baas den nos mes cas.
Betico a sacrifica su bida familiar, door di e trabounan y biahenan cu e mester a haci pa preparacionnan pa logra su causa, e no por a pasa hopi tempo cu su casa y yiunan. Su famia tambe mester a sacrifica, ya cu nan tabata comparti Betico cu e pueblo di Aruba.
Betico a sacrifica su libertad, na momento cu a encarcele inhustamente, paso no por a haya prueba.
Betico a sacrifica tambe su salud, nos ta corda aki con ela wordo tira y mester a lucha cu su bida den hospital.
Pero ningun obstaculo a pone Betico perde su meta for di bista, semper ela continua cu e lucha. Su amor pa su pueblo tabata e motor pa e por a continua. Betico semper a carga e fe, e confiansa den su pueblo y cu hunto y uni so Aruba por logra autodeterminacion.
Awe ta danki na sacrificionan di Betico cu Aruba por tin su gloria y a logra haya su Status Aparte, Aruba a bira un Pais autonomo y asina nos mes por goberna nos Pais.
Ta danki na Betico cu nos tin nos propio Himno y Bandera y awe tambe nos tin nos escudo – cu na november proximo ta bay cumpli 70 aña ela keda estableci como un simbolo nacional-, nos ortografia, moneda, Gobernador, Gobierno, Parlamento, Banco Central y hopi otro institucionnan importante.
Betico a demostra cu pa logra metanan grandi ta necesario pa haci esfuerso y sacrificio.
Laga Betico su dicho ‘No tin lucha sin sacrificio, y no tin sacrificio sin gloria’ ta un guia pa nos logra idealnan den nos propio bida y un inspiracion pa hunto nos por sigui contribui grandemente na e desaroyo y progreso di nos pais.
Laga nos preserva su legado y mantene bibo e speransa cu ela inspira den nos.
Nos responsabilidad como pueblo ta pa honra su legado. No solamente celebra, pero tambe sigui su ehempel.
Laga nos sigui conta su historia, educa nos yiunan, e futuro generacion kende ta Betico Croes y kico tur ela haci. Traspasa su historia, kico e ta nifica pa nos y su logronan pa Pais Aruba.
Danki Betico cu awe nos ta un Pais liber y danki tambe pa e herencia cu bo a laga pa nos Pais Aruba.
Na famia di Betico Croes, pueblo di Aruba ta gradici boso pa a comparti Betico Croes cu nos pueblo.
Mayan ta e fecha natal di Betico, mi ta extende un cordial invitacion na cada un di boso pa bin presencia mayan mainta e ceremonia protocolar pa 9’or aki na Plaza Betico Croes durante cual nos lo duna e homenahe, respet y honor na Nos Libertador Gilberto Francois (Betico) Croes.
Un danki na tur esnan cu awe nochi a bin pa duna aporte na nos Manisfestacion Cultural pa enrikese nos cultura cu benta di cuminda, cos dushi, cos di bebe y tambe artesania.
Danki tambe pa nos publico cu ta presente y esnan cu ta sigui nos atrabes di nos planta nacional.
Un palabra di gradicimento ta bay tambe pa UNOCA pa nan coperacion. Un danki special ta bay pa e Comision Celebracion Dianan Nacional y Departamento di Cultura cu a organisa e tremendo programa cultural di awenochi y e acto protocolar mayan. Masha Danki!
Na nomber di Gobierno di Aruba, mi ta desea pueblo henter un Feliz Dia di Betico!
