E relacion estrecho entre Arubahuis y De Haagse Hogeschool ta duna bon resultado
ORANJESTAD – Diaranson dia 5 di februari, riba e prome dia di su biahe di trabou na Hulanda, Prome Minister Evelyn Wever-Croes a atende un presentacion na De Haagse Hogeschool na Den Haag, Hulanda. E presentacion di e studiantenan a trata di e materia di “Koninkrijkszaken” cu a a finalisa cu tareanan entre otro di Kabinet di Minister Plenipotenciario, Arubahuis.
E studiantenan a haci dos investigacion pa Aruba, un a trata di con por mehora e exito (“studenten succes”) di studiantenan Arubiano na Hulanda. Esaki a encera recomendacionnan hopi interesante riba kico tur por haci pa prepara studiantenan prome cu nan bai Hulanda pa studia, cual tur recomendacion, gobierno lo por implementa den futuro. Y e otro a trata di e website di Arubahuis. Pa esaki ta practico, indicando e servicionan cu Arubahuis ta duna y cu esaki ta suficiente pa asina e ciudadanonan Arubiano por haya e informacion necesario y facil.
Prome Minister ta indica cu e relacion entre Aruba y De Haagse Hogeschool ta uno special pa basta aña caba. Ya pa varios aña studiantenan ta bin Aruba y reuni cu Gobierno. Recientemente studiantenan di e scol tawata na Aruba unda Prome Minister a duna un “college” na Universidad di Aruba, hunto cu e studiantenan di Aruba, cu a duna bon resultado. Durante e presentacion di awe mainta, Prome Minister a haya un relato di biahe recien aki y por a scucha cu e studiantenan a keda hopi contento y satisfecho cu tur informacion ricibi y cu e trato cu nan a haya na Aruba di parti di Gobierno y di Parlamento di Aruba y tur otro lugar cu nan a bishita na Aruba e tempo ey.
“A trata di un atardi hopi interesante, intensivo y cu bon resultado. Principalmente ta bon pa wak e relacion estrecho entre Arubahuis y Haagse Hogeschool, cu ta resulta den bon proyectonan cu bon resultadonan cu nos por implementa pa mehora e servicio cu pais Aruba ta duna na nos ciudadanonnan na Hulanda. Mi ta gradici De Haagse Hogeschool pa organisa proyectonan cu ta educa nan studiantenan riba relacionnan cu Reino Hulandes. Mi ta wak atras riba un prome encuentro exitoso aki na Hulanda”, Prome Minister a expresa.
