Oranjestad – Aruba tin poco infrastructura pa enfrenta cambio climatico. Esaki ta un hecho ora a ricibi portfolio di Naturalesa na 2021. Sin data y strategia, no por tin accion efectivo. Pa esaki Minister di Naturalesa prepara un roadmap cu tres fase principal:
- Identifica riesgo y vulnerabilidad,
- Calcula costo di solucionnan climatico,
- Busca financiamento pa implementacion.
Den 2022, Minister Ursell Arends a asisti e UN Ocean’s Conference na Lisboa, Portugal, y Ministerio a asegura un acuerdo cu e Stimson Center pa implementa CORVI (Coastal & Ocean Risk Vulnerability Index).
Continuando na Aruba, a firma un colaboracion cu e IPDC (International Panel on Deltas, Coastal Areas, and Islands) pa fortifica capacidad y acceso na conocemento den Reino Hulandes.
Den 2023, Minister Arends a participa den e Our Oceans Conference y UN Water Conference na New York, promoviendo financiamento pa adaptacion climatico. Den 2023 tambe, den diferente reunion cu stakeholder for di sector priva y NGO’s pa bira partner pa traha na Aruba su resiliencia climatico. Agradecimentu special pa e siguiente entidadnan cu ta brinda sosten y colaboracion:
- Aruba Airport Authority, Aruba Bank, AHATA, ATA, Centrale Bank van Aruba, Meta Corporation, Setar NV, Utilities Aruba NV, WEB Aruba NV, ekipo di Ministerio di Naturalesa, y e NCRC.
Na 22 di April 2024, Dia di Mama Tera, Aruba a instala e National Climate Resilience Council (NCRC). Durante e evento, Aruba a firma dos acuerdo crucial:
- Acuerdo CORVI cu Stimson Center (USA)
- Acuerdo Climate Impact Atlas cu CAS y IPDC (Hulanda)
Durante 2024, tayer di stakeholder tabata clave den desaroyo di CORVI y Aruba’s Climate Impact Atlas. E encuesta CORVI di october 2024 ta duna resultadonan inicial positivo. Esfuersonan ta continuando pa ta mas resiliente contra cambio climatico. Dia 30 di januari, mas cu 35 diferente stakeholder a participa na e tayer di “Co-designing Aruba’s Climate Impact Atlas” duna door di NCRC y Climate Adaptation Services kende ta un partner sumamente valioso. Den colaboracion cu sector publico, priva y organisacionnan no-gobernamental a demostra cu Aruba ta liderando e esfuersonan pa traha un Strategia di Adaptacion Nacional.
Minister Arends ta manda palabra di gradicmento na e International Panel on Deltas, Coastal Areas, and Islands pa nan sosten tecnico y financiero den preparacion di Aruba su Strategia di Adaptacion Nacional. Aruba ta riba e bon caminda pa por compronde riesgo climatico pa asina por bin cu implementacion di solucionnan efectivo. Na final di dia nos mester ta cosnciente cu Cambio Climatico ta afecta nos tur.
