ORANJESTAD – Dia 3 di februari 2025 Raad van Advies a entrega pa medio di e Presidente y Secretario di Raad su relato anual 2024 na Minister-President. Manera ta custumber e relato anual ta duna un bista habri y transparente di e tarea- y trabounan di Raad van Advies y su Wetenschappelijk Bureau. Tambe e ta duna un bista total di e consehonan cu Raad a duna den e aña cu a pasa.
Den su introduccion, e Presidente ta indica cu e biaha aki e finalisacion di e relato a cay hunto cu e prome fase di e proceso di e negociacion pa yega na formacion di un gabinete nobo. Den e proceso aki pa prome biaha a aplica e asina yama Landsverordening Integriteit Ministers. E ley aki tin como meta pa trece transparencia den e nombramento di e ministernan pa loke ta trata criterionan di integridad. Raad van Advies ta considera diligencia y transparencia prome, durante y despues di e proceso di nombramento di gran importancia.
Raad ta haya cu transparencia y claridad ta esencial den henter e aparato gubernamental. Ya caba na april di aña pasa e la duna un conseho (voorlichting) amplio cu recomendacionnan con pa (re)structura e aparato gubernamental.
Cu e tema di e relato anual ‘Samenhang, Duidelijkheid en Transparantie in een nieuwe overheidsorganisatie’ Raad un biaha mas kier pidi atencion pa esaki y asina duna un aporte na e (re)structuracion di e aparato unda coherencia, claridad y transparencia ta predomina y e transicion durante cambio di gobierno ta bay suave sin cu ta stroba e continuidad di funcionamento di e departamento- y servicionan di e gobierno.
E relato anual completo encuanto 2024 ta disponibel na e website di Raad van Advies www.rva.aw.
Potret 1
d.r.p.d. mr. D.G. (David) Kock, presidente, sra. mr. Evelyn Wever-Croes, Prome Minister, mr. A. (Albert) Braamskamp, secretario.
Potret 2
d.r.p.d. mr. A. (Albert) Braamskamp, secretario, mr. D.G. (David) Kock, presidente, mw. mr. Evelyn Wever-Croes, Prome Minister.
