E siman aki tabatin e intercambio di rehen entre e Palestino y Israel y nos por a mira na TV con e Palestinonan tabata celebra nan libertad. Mi kier comparti un experiencia personal cu mi tabatin cu dos Palestino CRISTIAN tempo cu mi tabata traha na Saudi Arabia.
Na aña 1973 mi tabata empleado di Exxon presta na Aramco y staciona den e ‘headquarter’ na Dhahran. Aramco, e tempo ey, tabata un consorcio di Exxon, Mobil, Socal (Standard Oil of California) y Texaco. Yasser Arafat tabata lider di PLO, conoci pa su actonan di terorismo, incluyendo, of especialmente pa, e atake riba e atletanan Israeli na Munich e aña anterior (1972). Tabatin Palestino cu tabata traha den oficina y na scol na Dhahran y, mi a descubri, tur tabata Palestino Cristian. Aparentemente, aunke e gobierno Saudite ta e protector di mundo musulman, e no tabata duna permiso na Palestino musulman pa traha aya. E famia real di Saudi Arabia tabata considera nan demasiado peligroso y no tabata confia nan.
Mi señora (d.f.m.) y ami a conoce un pareha Palestino (wak e foto) di cual e señora tabata duna les na muchanan den ‘Zondagschool’ di un kerki protestant na Dhahran. Mi dos yiu muher cu tabata asisti American Commnity School (ACS) di Beirut tabatin hopi duele cu e Palestinonan cu tabata biba den pobresa teribel na Lebanon. Te hasta nan a participa den un accion di ACS pa drecha y pinta un scol den un pueblo Palestino masha, masha pober cerca di Beirut. Cu e actonan di nos yiunan como referencia, y nos propio sentimentonan fuerte, nos por a forma un bon amistad cu e pareha.
Dia cu e ruman di e señora a bin pasa vacantie na Dhahran (e tabata studiante di un universidad renombra na Paris), nos a invit’e pa bay landa cu nos na e bunita beach di Ras Tanura. Pa nos sorpresa, nos a tende cu Palestinonan Cristian a haya pemiso pa traha na Dhahran y pa bishita otro pueblonan den e pais, pero nan, ni miembronan di nan famia, no tabata permiti pa bay Ras Tanura ni otro lugarnan caminda tin refineria of produccion di petroleo. E desconfiansa tabata yega asina leu!
E gobierno Saudite tabata duna respaldo moral y financiero na e actividadnan di Yasser Arafat y su PLO cu tabatin como un di su metanan principal e destruccion completo di e pais Israel, pero na e Palestinonan, ‘mafiish’, nada di reconocemento di igualdad. Ta mas di 50 aña pasa, pero di loke mi por lesa, poco a cambia den e politica di e pais Arabe pa cu e hendenan Palestino. Miyones di dollar ta bay pa nan, basta nan keda leu!
