Konseho di minister, riba proposishon di sekretario di estado Zsolt Szabó di Digitalisashon i Relashonnan den Reino, a bai di akuerdo ku nombramentu di señor Gerbert Kunst komo Representante nobo di Hulanda na Aruba, Kòrsou i Sint Maarten. E nombramentu di señor Kunst ta drenta na vigor entrante 15 di
mei 2025.
Mr. G.P.G. (Gerbert) Kunst na e momentunan akí ta direktor di Maneho Internashonal na ministerio di Enseñansa, Kultura i Siensia (OCW). E tabata anteriormente entre otro kònsùl-general di Reino hulandes na San Francisco i direktor di Asuntunan Oropeo i Internashonal na ministerio di Asuntunan Ekonómiko (EZ). Señor Kunst a studia derecho na Leiden i ademas ta poseé un Master of Business Administration (MBA) i un Master of Public Administration (MPA).
Representashon di Hulanda na Aruba, Kòrsou i Sint Maarten (VNACS) tin ofisina na Willemstad (VNW), Oranjestad (VNO) i Philipsburg (VNP) i e ta representá Hulanda den e tres paisnan. E Representante ta na kabes di nan i e ta hunga un papel krusial den mantenshon di un bon relashon ku e tres paisnan outónomo. VNACS ta kontribuí na realisashon di e maneho hulandes pa e paisnan i na su implementashon. Tambe VNACS ta brinda ayudo i asistensia na hulandesnan den nesesidat i ta koordiná e maneho di dunamentu di asistensia for di Hulanda den kaso di krísis grandi. Representashon ta ehersé su tareanan den bon kolaborashon ku tur kuater pais den Reino.
Gerbert Kunst: “E último añanan mi por a kontribuí for di OCW, huntu ku koleganan di Aruba, Kòrsou i Sint Maarten, pa fortifiká kolaborashon den Reino riba tereno di enseñansa, kultura i siensia. Por ehèmpel pa medio di kreashon di e Strategic Education Alliance. Ku e eksperensia ei i e firme konvikshon ku a base di un posishon di igualdat e kuater paisnan por logra mas huntu den konteksto di Reino, ku kada un su so, mi ta ansioso pa bai representá Hulanda riba tereno di maneho gubernamental kompleto den e tres paisnan ei. I prinsipalmente tambe pa hasi esei ku un tim di bon koleganan i motivá na e tres ofisinanan, ku kende gustosamente lo mi ta deseá di ta e persona prinsipal i e persona di konekshon pa tur partner maneragobièrnunan, kompanianan i sosiedat sivil, den e relashon akí.”
Sekretario di estado Szabó ta kontentu ku e nombramentu: “Gerbert Kunst ta trese un rikesa na eksperensia internashonal i for di Den Haag kuné. E ta un profeshonal motivá i mi ta spera ku huntu ku su koleganan e lo bira e intermediario importante ku por duna un kontribushon riba tantu tereno ekonómiko-finansiero, komo e tereno di mantenshon di lei, pa amplia i profundisá e relashon. Mi ta kontentu ku nos a haña un kandidato pa e puesto akí, ku en bista di su konosementu i eksperensia ku e partinan karibense di Reino, tin bista pa loke tin mester pa un bon kolaborashon entre Hulanda i Kòrsou, Aruba i Sint Maarten.”
Te ora ku e representante nobo asumí su enkargo, drs. S.J.P.L. (Saskia) de Reuver, a base di su funshon komo direktor Relashon di Reino/Paisnan na ministerio di Asuntunan Interno i Relashonnan den Reino, lo fungi komo Representante na Aruba, Kòrsou i Sint Maarten interino.
