Aruba, 30 di januari 2025
Mike Eman a duna un entrevista na Speed dia 23 di januari 2025. Den e entrevista Mike ta yama e reduccion di e tarifa di inkomstenbelasting y loonbelasting di MEP un decision apresura, no planea, cu intencion di obstaculisa e promesa y vision grandi di AVP pa bolter cos. Segun Mike, gobierno a kita 50 miyon florin cu mester a yuda esnan cu un entrada bao di Afl. 3.500,-. Asina Mike a double down riba su declaracion di dia 15 di januari 2025 cu e reduccion di tarifa ta un maniobra di mala fe y un atentado contra di e oportunidad di yuda esnan di entrada mas marginal den nos comunidad.
Cu e declaracionnan aki nos tin un bista basta cla di e maneho financiero cu e FUTURO Gabinete Mike Eman III kier hiba. Pa cuminsa nos sa cu Mike ta kere den fia placa y haci debe pa financia su ideanan. Nos sa cu e ta contra e insistencia di Evelyn pa haci rekensom pa dicidi riba maneho y e ta contra e insistencia di Xiomara pa crea surplus riba presupuesto si esey kiermen cu e no por realisa su maneho. Tampoco Mike ta kere den Gabinete Wever-Croes su vision pa un transicion for di impuesto directo pa indirecto. Y cu Mike su ultimo declaracionnan nos por compronde cu “bolter cos” no ta nada mas cu bay bek na e maneho financiero di Gabinetenan Mike Eman I y II. E unico aspecto adicional ta un politica di apoyo directo den forma di un inyeccion di placa den cartera di tur hende cu tin un entrada bao di Afl. 3.500,-. Segun Mike esaki ta loke ta bay combati pobresa.
Na e superficie, e por parce un solucion husto. Pero si nos analisa mas profundo, nos ta mira cu apoyo directo ta depende di un fluho constante di mas y mas placa. Na e superficie e por parce un gesto simpatico, pero esaki ta crea un dependencia continuo cu ta imposibel pa sostene sin afecta otro sector di nos economia.
E problema: apoyo directo como un mangel materialista
Durante e pandemia Gabinete Wever-Croes tambe a haci uzo di medidanan di apoyo directo den forma di e ayudo di FASE. Esey tabata un medida hopi costoso pero hustifica pa yuda famianan supera e situacion temporario di e pandemia. Pero, pa uza apoyo directo pa yuda hende cu tin un entrada bao di Afl. 3.500,- na un manera structural ta simplemente un politica di Robin Hood: kita for di clase media pa duna na e pober. Mike sa cu no tin espacio riba presupuesto pa carga e plan aki y Mike sa cu Hulanda no lo permiti pa hinca Aruba den mas debe structural pa nos yiunan paga mayan. Tambe Mike sa cu economia a expande bao di maneho turistico di Dangui y cu pueblo alabes no kier mira construccion di mas hotel. E unico cosnan cu ta resta ta pa haci loke Mike mes a bisa caba: uza e placa extra cu aumento di BBO y BBO na frontera a genera pa financia e apoyo directo y adicionalmente pone e hobennan paga pa e pensionadonan. O sea, Mike kier hinca su man den cartera di tur hende cu tin un entrada di Afl. 4.000,- of mas, pa financia su politica di apoyo directo.
Loke Mike no ta bisa ta cu inflacion ta un fenomeno cu tey pa keda. Ningun pais na mundo por a para inflacion y esey tin di haber cu e structura di e sistema bancario internacional. Esey ta nifica cu si Mike kier soluciona pobresa di e forma aki, e lo mester aumenta e apoyo directo tur aña pa e grupo no cay den pobresa bek. Esey ta nifica cu tur aña e mester saca mas placa for di cartera di tur cu tin un entrada di Afl. 4.000,- of mas, empobreciendo henter nos clase media te ora cu no ta existi un clase media mas. Tur maestro, tur polis, brandweer, ambtenaar, taxista etc. lo ta pober. P’esey Mike su uzo di apoyo directo no ta nada mas cu un mangel materialista diseña pa encarcela su votadornan den un mentalidad di pobresa y dependencia.
E solucion: idealismo cu ta lucha pa husticia y progreso
Si nos kier laga un pais prospero atras pa nos yiunan y nos nietonan, nos mester cuminsa na bandona e politica di mangel materialista cu su retorica bashi. Nos mester bandona e tipo di insulto cu Mike ta uza pa mantene pueblo encarcela den emocionalismo, manera “maniobra di mala fe”, “atentado” y “masacra”. Nos mester restaura e cultura unda nos ta contesta cada argumento cu argumento, loke a hiba nos na convence Hulanda cu nos ta un pueblo, cu nos tin e derecho di autodeterminacion y cu nos mester haya nos Status Aparte.
Den e caso specifico di combati pobresa na un manera sostenibel riba largo plaso, nos tin mester di un maneho cu ta crea stabilidad economico structural y cu ta ataca e raiznan di pobresa. Esaki ta cuminsa cu pone finansas publico na ordo y reduci e debe nacional, pa asina menos impuesto bay perdi na paga interes y mas recurso ta disponibel pa inversion social y economico. Corupcion mester wordo combati cu firmesa, pasobra corupcion ta alimenta desigualdad y inhusticia. Adicionalmente, nos mester di un transicion fiscal inteligente: menos belasting riba bo salario of ganashi y mas enfoke riba impuesto indirecto. Esaki ta nifica cu turista y esnan cu ta traha den economia informal tambe ta contribui na e gasto di estado, resultando den un distribucion mas husto di belasting. Esaki ta duna gobierno e recurso necesario pa combati pobresa na un manera sostenibel, sin aplasta e clase media y sin laga nos yiunan hereda mas debe. Enfin, e unico caminda serio nos dilanti ta: un base financiero solido, un structura di belasting husto y un economia cu ta stimula independencia financiero.
