‘Un otro prestigioso linea crucero cu ta reenforsa strategia di High Value – Low Impact’
Cu un caluroso bonbini, Aruba ta ricibi barco crucero luhoso Ilma di flota di The Ritz-Carlton Yacht Collection. E ocasion significante aki ta marca e promer bishita di e barco crucero Ilma y ta resalta un exito importante cu un turn-around completo, caminda huespednan ta subi y desembarca na e waf di Aruba.
Pa celebra e evento historico aki, a conta cu un ceremonia formal hunto cu delegacion di Aruba Tourism Authority (A.T.A.), Aruba Ports Authority (APA), representatenan di Imigracion di Aruba y Port Agency Maduro & Sons.
Ilma, e miembro di mas nobo di The Ritz-Carlton Yacht Collection, ta representa un mescla elegante entre sostenibilidad y luho. Como e segundo barco den e coleccion despues di Evrima, lansa den 2022, Ilma ta presenta característicanan inovador cu ta pone turismo crucero luhoso na un nivel mas halto. Su nomber ta deriva di e palabra Maltes “ilma”, cu ta significa “awa”, reforsando su conectividad cu sostenibilidad maritimo.
Ilma a wordo lansa den 2024 y tin e sigiuente caracteristicanan impresionante:
- Tonahe bruto: Aproximadamente 46,750
- Largura: 790 pia (241 meter)
- Miembronan di tripulacion: 350
- Capacidad di huesped: 456
- Suites: 228, tur cu terasa priva
- Restaurant gourmet: Varios, cu menu prepara pa chefs di renombre
Alabes, algun caracteristica di Ilma ta inclui tecnologia hybrid cu combustibel LNG, un diseño moderno di luho den tur su suites espacioso, un piscina infinito, un centro di bienestar y un spa amplio. Huespednan por spera un servicio personalisa y renombra di Ritz-Carlton, redefiniendo e arte di biahe luhoso.
E bishita especial aki ta ofrece huespednan di Ilma un anochi na Aruba, proveendo e oportunidad unico pa descubri e cultura vibrante y atraccion di Aruba.
Durante e evento ceremonioso aki, por a presencia intercambio tradicional di plakaat, un custumber maritimo cu ta honra e prome bishita di un barco crucero na un porta di waf nobo. E gesto simbolico aki ta enfatisa e laso di cooperacion y harmonía entre Aruba y The Ritz-Carlton Yacht Collection.
Den representacioon di Aruba entre otro, Ronella Croes, CEO di Aruba Tourism Authority, y Marc Figaroa, CEO di Aruba Ports Authority, a presenta un plakaat conmemorativo na e capitan di Ilma, Darin Bowland, cu a expresa su gratitud pa e ricibimento caluroso di nos localnan.
E yegada di Ilma ta provee sosten na e estrategia di atrae cruceronan luhoso y eleva experiencia turístico na Aruba den e sigiente manera:
- Atraendo mas huespednan cu ta contribui significativamente na nos economia local.
- Promove estadia mas largo den nos waf
- Promove biishita durante low-season, y asina entre otro mehora e distrubicion di barconan crucero anualmente y distribui huespednan miho riba nos isla.
- Inverti den capacitacion y entrenamiento di nos socionan local den e industria di crucero.
- Ofrece entrenamento di risk-management y desaroyo di producto pa eleva e nivel di servicio y promove mas sostenibilidad y turismo responsabel.
Mientras cu Ilma ta sali pa su siguiente destinacion, Aruba ta mira dilanti na mas cooperacion cu The Ritz-Carlton Yacht Collection y otro lineanan di crucero luhoso. Su bishita ta fortifica Aruba como un destinacion di balor halto den Caribe, caminda luho y sostenibilidad ta bai hunto den armonia pa crea experiencianan inolvidabel.
