“Awo por cuminsa busca e personal pa asina por cuminsa funciona manera ley ta prescribi”
Dialuna a tuma luga den Parlamento di Aruba, tratamento di e plan di formacion, “formatieplan” di e Bureau Ombudsman. E concepto di e formatieplan a wordo trata hunto cu departamentonan di Gobierno pa asina hunto yega na un structura pa e Bureau Ombudsman manera tin mester segun e vision y mision cu ta hancra den ley.
Den su funccion como Parlamentario pa Fraccion di MEP, señora Evelyn Wever-Croes a duna su disertacion cuminsando pa repasa e historia di e ley aki. E ley di ombudsman ta un ley cu un trayecto di hopi aña y por bisa cu a cuminsa desde aña 1997 na unda cu instruccion a wordo duna pa cuminsa explora e posibilidad pa Aruba haya su Ombudsman, e Defensor di Pueblo.
Na aña 2005, un concepto di ley a keda entrega na Parlamento como un ley di iniciativa di ex Parlamentarionan di MEP señora Zulay van Poppel-Marquez, señor Seferino ‘Sa’ Bislik y senor Edwin Jacobs. Despues cu nan a sali di Parlamento, na 2009, Parlamentario Wever-Croes hunto cu ex-Parlamentario e tempo ey pa Fraccion di MEP, señor Booshi Wever, a pidi pa tuma e ley aki over. Sinembargo e tempo ey e gobierno di AVP no tabata kier a duna cooperacion pa Aruba haya un Ombudsman y atrobe e ley a keda para te ora cu Partido MEP a drenta gobernacion na 2017. Gabinete Wever-Croes 1 a pone como prioridad pa Aruba tambe haya su Ombudsman siendo e unico pais den Reino Hulandes cu no tawata tin Ombudsman.
Dia 9 di september 2020, bou dirigencia Parlamentario Edgard Vrolijk, Parlamento di Aruba a pasa e ley mes di Ombudsman. E deseo tawata tambe pa hancra e funcion di Ombudsman den nos Constitucion pa asina e ta un Colegio Halto di Estado. Cu esaki, ningun gobierno cu bin sinta despues lo no por kita esaki for di Aruba, principalmente mirando e falta di cooperacion cu tawata tin pa bin cu e Ombudsman prome.
E cambio di constitucion aki a wordo trata den Parlamento na februari 2021, sinembargo esaki a keda posponi. Riba e fecha di 10 di maart di 2022, den un constelacion diferente, e ley a bolba keda trata den Parlamento.
E fecha aki, Parlamentario Wever-Croes ta considera un dia scur pa henter Aruba ora cu e ley pa hancra Ombudsman den nos Constitucion, no a haya e sosten pa asina awe como Arubiano, no solamente nos por ta orguyoso di tin nos Ombudsman sino nos lo tawata tin esaki hancra den nos Constitucion. Lamentablemente oposicion no kier a sostene esaki, AVP a vota contra y pues no tabata tin 2/3 parti di voto pa cambia nos Constitucion.
Dia 23 di januari di aña 2023, Fraccion di MEP, un biaha mas bou diregencia di Parlamentario Edgard Vrolijk, a entrega un ley di iniciativa adapta y a keda acepta den Parlamento. Den e ley aki a regla e nombracion y retiro di e ombudsman y e kinderombudsman. Despues di esaki e trabounan por a continua na unda cu a bin na un profielskets cu a haya aprobacion y sosten di henter Parlamento. Aruba, riba e fecha di 1 di october, 2024, a conoce su prome Ombudsman, su Defensor di Pueblo, señora Jurima Bryson.
Mayoria di e trabounan ta hancra legalmente y huridicamente. Gabinete Wever-Croes a percura cu den Presupuesto pa 2025, tin presupuesto pa Bureau Ombudsman por funciona manera mester ta. A traves di e Kwartiermaker cu Parlamento a institui, señora Sahaira Kelly, a traha riba e procesonan financiero, riba huisvestiging, riba e procedura di keho y a traha tambe riba e parti di personal.
Dialuna 27 di januari 2025, Parlamento unanimamente a aproba e plan di formacion, “formatieplan” pa e Bureau Ombudsman. Y awo Bureau Ombudsman por cuminsa busca e personal pa asina por cuminsa funciona manera ley ta prescribi.
“E ta nos compromiso pa presenta e cambio di Constitucion pa ancra Ombudsman den Constitucion e luna aki ainda y mi ta spera cu e ora si nos por conta riba sosten di henter Parlamento pa esaki. E ora nos por bisa realmente cu nos por ta trankil pasobra ta esey so por duna e Ombudsman e garantia cu ningun gobierno den futuro lo elimina e Ombudsman. Cu e aprobacion di awe, nos Ombudsman por cuminsa busca personal pa traha na e bureau. Un tremendo noticia!”, Parlamentario Evelyn Wever-Croes a expresa.
