ORANJESTAD – Corte di Husticia a trata e caso penal cu Ministerio Publico a cuminsa contra e homber Y. (72). E homber Y. a wordo haya culpabel di a haci actonan inmoral cu su nieto y a wordo condena na 18 luna di prison.
ARUBA NATIVE por a compronde cu e victima, e hoben S., a bati su welo cu bati di baseball, ora cu el a lanta for di soño y haya su welo drumi riba dje.
Den sala di Corte tabata presente e victima hoben S., acompaña pa su madasta. Fiscal a acusa Y. di a abusa sexual di su nieto S. riba 2 Juni 2024. Fiscal a sigui bisa cu, subsidiario e ta acusa Y. di a haci actonan inmoral cu S.
DEMANDA DI DAÑO
Ta asina cu S. a haci demanda di daño di 50 mil florin total, cu ta encera daño emocional, trauma, perdida di trabao. E madastra a splica Hues riba e demanda di daño ya cu S. no kier a papia.
WELO A ABUSA DI NIETO
Hues a cuminsa puntra Y. si ta berdad cu el a abusa di su nieto riba 2 Juni 2024. Y. a bisa cu no ta berdad. El a bisa cu e tabata inconciente y no sa si algo a pasa. El a bisa cu ora e bebe alcohol, sa pasa cu e ta perde conocimento kico e ta haci. El a bisa cu ora el a bin bei, el a ripara cu S. a maltrat’e cu un bate di baseball. Hues a mustra cu S. a declara cu ora e tabata na soño y ora el a spierta, el a haya Y. drumi riba dje. Segun S., Y. a subi riba dje y baha su carson y pone su parti intimo mey mey di S. su bilnan. Y. tabata sacudi cabez y a bisa Hues cu e no sa di nada. Segun Y., el a pidi pa haci DNA. Hues a bisa cu a haci investigacion forence cu ta mustra cu Y. a satisfase su mes riba su nieto. Y. a bisa Hues cu el a pidi pa haci test di DNA.
Hues a remarca cu no ta promer biaha. Na 2013 caba Y. a wordo condena pa a abusa di su nieto S. El a wordo condena na 2 aña di prison. Segun Y., e no a haci nada y inhusto el a wordo condena. Hues a remarca cu e Hues e tempo ey si a haya Y. culpable.
PEDOFILE?
Hues a bisa cu psycologo a evalua Y. y psycologo ta haya cu Y. tin tendencia pedofile pero no por segura esey pasobra Y. ta nenga tur cos. Hues a remarca cu Y. ta bisa cu e no ta busca relacion cu mucha homber jong pero ta un hecho cu el a haci’e. Y. a reacciona cu e no ta abusa di un mucha y tampoco di un hoben homber. Hues a mustra cu tin raport di Reclasering cu tambe ta mustra cu Y. tin tendencia pedofile. E raport di Reclasering ta mustra cu tin miedo cu Y. ta bolbe ripiti mirando cu el a haci’e un biaha caba. Tanto psycologo como Reclasering ta haya cu Y. mester haya tratamento.
Den sala di Corte tabata presente un miembro di Reclasering y riba peticion di Hues, el a duna su punto di bista. E miembro di Reclasering a bisa cu awor e ta tende cu Y. tin problema cu alcohol tambe. E ta haya cu Y. mester haya tratamento.
Ta asina cu Y. a bay di acuerdo pa haya tratamento mirando kico e raportnan ta bisa. Hues a puntra si e tratamento mester ta obligatorio. E trahador di Reclasering a bisa cu no tin un instituto pa Y. haya tratamento pero den e caso aki, e ta hopi importante pa Y. haya tratamento di psycologo. Reclasering tin psycologo y e tratamento lo ta cu Y. mester presenta tur biaha pa tratamento. E ta haya cu Y. mester di guia intensivo pa mira con e relacion den famia lo sigui.
VICTIMA NO KIER SA NADA MAS DI WELO
- hunto cu su madastra, compaña pa un miembro di CEA, a bay para tras di un mesa cu un mike pa asina S. por expresa su mes. S. a remarca na Hues cu Y. ta bisa cu e no sa di nada pero e sa masha bon kico a pasa! S. a bisa Hues cu e caso aki a afect’e masha hopi. E ta den trauma, no por focus hopi bon mas. S. a bisa cu e no kier sa mas di Y. E madastra a bisa Hues cu S. ta hopi emocional y ta bebe hopi door di e trauma cu el a sufri. El a bisa cu e mama di S. ta hopi afecta y no por a presenta den Corte.
FISCAL A EXIGI 18 LUNA
Fiscal a bisa Hues cu 2 Juni 2024, Polis a bay na un cas pa un problema familiar. Eynan, Polis a topa cu Y. cu man sangra y cu e tabata bou influencia. Y. a bisa cu e tabatin problema cu S. S. mes no tabata presente. Mas laat, S. a presenta na Polis cu su mama. S. a bisa cu e tabata drumi cu carson largo bisti. Na dado momento el a spierta ora cu su amiga a yam’e na cellular. El a sinti hende riba dje y a mira cu ta Y. y S. su carson tabata baha. E momento ey S. a rabia asina hopi cu el a coy un bate di baseball y maltrata Y. cu esaki. Fiscal ta haya cu e declaracion di S. ta suficiente y tin prueba di sosten. El a mustra cu na 2013 caba Y. a abusa di S. E tempo ey S. tabata menor di edad. Riparabel ta, cu e mesun manera S. a wordo abusa. Fiscal a mustra cu e tempo ey den e sentencia, ta mustra cu Y. tabata bou influencia di alcohol y cu Y. tabata mishi cu S. E tata di S. a bisa cu el a mira su yiu yega cas riba brommer coriendo duro, sin flanel. El a mira S. hopi emocional y S. a bisa su tata cu el a bolbe sosode. E mama tambe a bisa mesun cos. Fiscal a bisa cu for di investigacion no ta sali na cla cu tabatin penetracion y pesey mester declara Y. liber di abuso sexual. Si Fiscal ta haya Y. culpable di a haci actonan inmoral cu S. Fiscal ta haya cu Y. a tacha integridad di S. Fiscal ta tuma Y. na malo cu a abusa di e situacion.
Fiscal a bisa Hues cu por a scucha kico ta e impacto riba S. y cu lo keda. Pa cu e castigo, Fiscal a bisa cu e ta tene cuenta cu den pasado caba Y. a abusa di S. y awor atrobe. E ta tene cuenta cu psycologo ta haya cu tin tendencia pedofile. Psycologo ta haya Y. pa un parti ta menos responsabel. Psycologo ta haya cu Y. mester di tratamento. Reclasering tambe ta haya cu Y. mester di guia intensivo. Fiscal a exigi 18 luna di prison pa Y., di cual 6 luna ta condicional cu 3 aña di prueba. E castigo ta bay cu e condicion cu Y. mester cay bou guia di Reclasering durante e tempo di prueba. Fiscal tambe a exigi pa prohibi cu Y. tin contacto cu S. of den sercania di S. durante e 3 aña di prueba. Pa loke ta e demanda di daño, Fiscal ta haya cu esaki no ta specifica kico realmente ta e gastonan y pesey mester declara esaki no admisibel. Sinembargo Fiscal a mustra cu mirando cu tin sentencia di Corte di Hulanda pa caso sin demanda, el a pidi pa impone pa Y. paga 2 mil florin.
ABOGADO
Abogado mr. Kuster a bisa Hues cu na 2013, Y.(72) a wordo condena caba pa algo asina. El a mustra cu despues cu Y. a sali liber, e no a haya guia. E abogado a mustra cu Y. ta alcoholico y ta perde conocemento. Psycologo ta haya cu Y. ta menos responsabel pa loke el a haci. Tanto psycologo como Reclasering ta haya cu e chens pa ripiti ta grandi. Abogado a bisa cu e ta comparti opinion di Fiscal cu mester declara Y. liber di a abusa di S. E ta haya cu lo ta mihor tratamento obligatorio pa Y. y no castigo largo den prison. E abogado ta comparti opinion di Fiscal pa loke ta e demanda di daño.
HUES A CONDENA ACUSADO
Hues a pospone e caso un rato pa e bay evalua. Ora el a bolbe, el a sera tratamento di e caso y a dicta sentencia. Hues a bisa cu e ta haya legalmente proba e acusacion subsidiario esta cu Y. a haci actonan inmoral cu su nieto. Hues no ta haya proba abuso sexual. Hues a bisa cu esaki ta un caso hopi serio. No ta promer biaha cu Y. ta wordo condena pa e mesun cos. Psycologo ta mustra den raport cu pa un parti Y. no ta responsabel pero cu mester di tratamento. Reclasering tambe ta bati bel. Hues ta haya e exigencia di Fiscal na su lugar.
