Driftmento di dos Altezza a conduci na detencion di tres persona y den un di e autonan polis a bin topa cu tres criatura.
Seroe Blanco/Paradera: Diamars, algo pasa di 6’or di mainta, na altura di Sividivi un patruya di polis ta scucha auto ta drift y ta haya holor di tire kima. Mesora e patruya ta cuminsa bay direccion di e rotonde Seroe Blanco y ta mira dos Altezza cu lo a caba di drift saliendo for di Citgo Seroe Blanco cu velocidad hopi halto, bayendo direccion di Paradera.
Dilanti Morning Supermarket polis ta logra para e dos autonan
Mesora e patruya ta sigui nan tras y ta manda pidi refuerso, na altura di Morning Supermarket e patruya ta logra para e dos autonan, eynan mas patruya ta yega pa yuda e patruya atende cu e ocupantenan. Tabata ta trata di dos Altezza un blanco numera 45846, cu su papelnan no tabata na ordo y e otro ta un Altezza preto numera A12604.
Tres detencion a cay
E ocupantenan den e Altezza blanco a keda trankil y a cumpli cu loke polis a bisanan, pero e ocupantenan di e Altezza preto si a insulta polis verbalmente y mesora detencionnan a cuminsa cay. E prome detencion tabata di e chauffeur di e Altezza preto cu aparentemente tabata bou influencia, despues e ocupante masculino cu kier a lanta cu polis. E ultimo cu a keda deteni tabata un dama cu tambe tabata den e Altezza preto, ela keda deteni pa motibo cu e no a respeta ordo di polis, e tabata hostina y a insulta e agentenan policial hopi mahos.
Tres criatura den e auto
Den e Altezza preto tabata tin 3 mucha chikito y un otro dama mas, e dama aki no a keda deteni pero a wordo permiti pa yama un miembro di famia pa bin busca nan.
E Altezza preto tabata core riba un spare tire, patras na e banda drechi, e sparetirenan aki ta pa djes core bay un destino y no pa core rond y mas pio pa drift of core cu velocidad halto. E chauffeur di e Alezza preto no solamente tabata trece su bida den peliger, pero tambe bida di 4 adulto y 3 mucha y mas pio drift cerca di un gasstation.
Riba instruccion di fiscal a laga confisca tur dos auto
E agentenan policial riba instruccion di fiscal a laga confisca e dos Altezzanan aki y polis a detene dos homber y un dama, nan a wordo transporta cu transportwagen di polis pa warda di polis. E dos ocupantenan di e Altezza blanco no a keda deteni, mirando cu nan a keda trankil y a sigi instruccion di polis, pero nan auto si a keda confisca y nan a cana bay direccion di nan cas.