ORANJESTAD – Falta dos dia pa 25 di januari, Dia di Betico, y desde varios aña, Prome Minister Evelyn Wever-Croes ta bishita scolnan na Aruba en conexion cu e dia aki. Pa e fecha special aki, scolnan na Aruba ta prepara alumnonan dunando informacion di e bida y logro di e gran politico, lider, estadista y Libertador Arubiano, señor Gilberto François ‘Betico’ Croes.
Prome Minister diahuebs mainta a clausura su bishitanan na Colegio Santa Famia na Pos Chikito. E mandatario a wordo ricibi pa Cabesante Sigfried Kelly y a wordo dirigi na klasnan 5 y 6 na unda cu el a keda hopi impresiona con hopi interes e muchanan tin pa conoce mas di Betico. Nan a haci preguntanan interesante y hopi detaya unda Prome Minister den su turno a responde esakinan y a conta nan un tiki mas di e storia di nos Libertador Betico Croes. E mandatario a keda impresiona pa wak e interes grandi cu e muchanan tin desde un edad jong, pa sa e storia di e gran Arubiano cu a logra Status Aparte pa Aruba.
“Cu e bishita aki mi ta clausura mi bishitanan na scolnan. Mi ta lamenta cu mi no por logra bishita tur scol, pero e satisfaccion ta grandi di wak con cada aña e interes y conocimento di bida di nos Libertador Betico Croes ta crece den e muchanan. Danki na tur scol, tur docente pa e trabou grandi cu nan ta haci pa e muchanan conoce e legado di Betico cual ta altamente aprecia. Boso ta formando bon ciudadanonan cu conoce nos historia. Como adulto ta nos deber pa inculca e amor pa cultura di Aruba den nos muchanan, celebrando Dia di Betico cu orguyo, manera mester ta.
Mi ta gradici Colegio Santa Famia, Cabesante Sigfried Kelly y tur docente y alumnonan pa e mainta ameno. Di curason mi ta gradici e docentenan pa guia e muchanan riba e importancia di carga den nan curason e amor cu Betico tawatin pa Aruba”, Prome Minister a expresa.
