ORANJESTAD – Ya ta falta apenas un par di dia pa 25 di januari, e celebracion di e fecha natal di e gran politico, lider, estadista y Libertador Arubiano, Betico Croes. Den cuadro di e dia Nacional aki, diahuebs mainta 23 di januari, Prome Minister Evelyn Wever-Croes a sigui bishita scolnan rond di nos isla manera e ta bin ta haciendo pa varios aña.
Riba e mainta aki, Prome Minister a bishita St. Paulus School na San Nicolas. Den un ambiente alegre y festivo, e mandatario a wordo ricibi pa e Cabesante di scol, señor Randy Arends acompaña pa e alumnonan formando un coro cantando Himno di Aruba mientras a hisa e bandera. Un momento hopi special pa e mandatario ken yen di emocion a expresa su alegria y gratitud pa e echo special aki.
Despues di e bunita ricibimento, Prome Minister a bishita klasnan 6 di juffrouw Alice y meneer Eltienne unda Prome Minister a comparti cu e muchanan un poco di e historia di Aruba su Libertador, Betico Croes. A trata di un charla hopi interesante, unda por a wak e interes grandi di e muchanan pa sa mas di Betico su bida y lucha pa Aruba.
“Mi ta gradici cabesante y maestronan pa haci e dia aki asina special pa mi y pa e muchanan. E preparacion di muchanan pa Dia di Betico ta algo special y importante. Mi ta contento pa mira con e cuerpo di maestro di St. Paulus School, semper den grandi, ta prepara e muchanan pa celebracionnan cultural y asina inculca den curason di e muchanan, e amor pa Aruba.
Awe mainta, ora e bandera a bay halto, y e muchanan a canta nos Himno, mi por a wak e amor cu e muchanan tin pa Aruba, e mesun amor cu Betico semper a sinti pa Aruba. Ta mi deseo cu Betico su lucha y su bida, lo ta un inspiracion pa cada mucha, cada adulto, cada un di nos cu ta biba riba e pida baranca aki cu tanto nos ta stima”, Prome Minister a expresa.
