Recientemente Gobierno di Hulanda, a traves di e comandante di Instituut Samenwerking Defensie en Relatieziekenhuizen (IDR), a cera un acuerdo cu Stichting Ziekenverpleging Aruba, cu ta e fundacion cu ta maneha Horacio Oduber Hospital (HOH). Den e acuerdo aki, Ministerio di Defensa di Hulanda lo manda personal medico pa e hospital di Aruba, den forma di cooperacion. Lo por conta riba dokter, nurse profesional, asistentenan den sala di operacion y personal specialisa den duna anestecia.
E acuerdo aki ta di cinco aña largo y a cuminsa awo cu tres profesional cu ta bini y traha na Hospital di Aruba for di Hulanda. E prome tres profesionalnan ta no menos cu dos asistente di sala di operacion y un asistente den duna anestecia. Mas durante aña lo intercambia y otro profesionalnan lo bini Aruba, cu lo inclui tambe dokternan. Tur lo permanece durante dos pa tres luna na Aruba.
Jacco Vroegop, Presidente Hunta di Directiva, a inicia bisando cu e colaboracion hunto cu Defensie ta un logro bunita pa hospital mirando cu di e manera aki nos ta yuda den amplia nan conocemento y a cambio nan ta yuda nos cu personal. Pa nos isla, esaki ta un adelanto enorme, di por conta cu mas ayudo medico for di Hulanda. E cooperacion aki ta entre diescuater hospital na Hulanda y HOH Aruba ta bira e prome y unico hospital pafo di Hulanda. Nan ta Haaglanden MC, Erasmus MC, Leids MC, NWZ Groep Alkmaar, Maasstad Ziekenhuis, Amsterdam UMC, MC Leeuwarden, UMC Utrecht, Gelre Ziekenhuizen, Radboud MC, UMC Groningen, Medisch Spectrum Twente, Maxima MC, Maastricht UMC y awo tambe HOH Aruba.
Elena van Rietschoten, asistente den sala di operacion ta conta cu e oportunidad aki ta nifica cu e lo por bay adkiri experiencanan nobo mirando cu casi sigur akinan ta traha diferente cu na Hulanda y mi ta hopi curioso pa sa kico tur mi lo bay siña na HOH.
Johan van den Berg di (IDR), caminda ta conta cu personal medico militar ademas di e personal civil. “Loke nos ta en busca ta e forma di cuido cu na Hulanda cada biaha tin mas escasez di dje, mirando cu cada bes e cuido ta wordo duna di manera no invasivo. Pa nos di defensie ta hopi importante pa entrena a base di “damage control surgery” mirando cu den momentonan di necesidad nos no lo ta operando den un Hospital sino pafo. Y cu e cooperacion aki nos ta keda “up to date” y a cambio HOH Aruba por conta cu extra personal.
Jan Ringers, ciruhano di HOH, a indica cu nos ta un hospital special caminda hopi cos ta sosode loke no ta e caso na Hospitalnan di Hulanda, specialmente Hospitalnan Academico. Alrededor di dos aña pasa Ringers a inicia cu un combersacion riba e posibilidad aki. Tur cos a cuminsa cu djis un kopi di koffiey awe hopi contento cu a yega na cera e cooperacion aki. Impotrtante pa menciona cu coleganan di Defensie no lo tuma luga di ningun personal di hospital, pero nan lo t’ey pa sostene organisacion a cambio di adkiri mas experiencia.
Vroegop ta masha orguyoso di hospital y di tur loke Aruba ta logrando den e region. Por ultimo, el a gradici Defensie pa e confiansa brinda na HOH.
