ORANJESTAD – Diamars mainta 21 di januari, Prome Minister Evelyn Wever-Croes a continua cu su bishitanan na varios scol en conexion cu Dia di Betico dia 25 di januari cua ta e fecha natal di e gran politico, lider, estadista y Libertador Arubiano, señor Gilberto François ‘Betico’ Croes. Bishitanan na scolnan durante e dianan prome cu e fecha, ta un tradicion bunita di tur aña di e mandatario.
Diamars mainta na Colegio Conrado Coronel, Prome Minister a wordo ricibi pa maestronan hunto cu alumnonan entusiasma y contento cu banderin di Aruba den man. Prome Minister cu un curason alegre a saluda e muchanan pa despues sigui pa klasnan 5. Akinan e muchanan a haya oportunidad pa combersa cu Prome Minister ken a haci preguntanan na e muchanan cu a mustra cu nan tin hopi conocemento y interes den e storia di bida y logronan di Betico. Esaki a duna e mandatario un satisfaccion grandi ya cu e por a mira cu e muchanan sa kico tur Betico a haci y dicon ta dedica tanto na dj’e y tin un dia liber pa celebra Betico.
Prome Minister:
“Mi ta gradici meneer Frenk, demas docente y e alumnonan di klas 5 di Colegio Conrado Coronel pa permiti mi bishita e scol un rato pa asina comparti un poco di Betico su bida, su lucha y su logronan. Mi ta convenci cu mas nos muchanan sa di Betico, mas nan sa di su logronan y con el a haci’e, esaki por ta un inspiracion pa nan tambe ora e momento yega pa nan tuma decisionnan grandi den nan bida. Dia di Betico ta un dia pa reflexiona y celebra, pero mas ta un dia pa nos ta orguyoso cu nos como un pais chikito riba e mundo aki, a conoce un gran lider, estadista y un gran Tata di Aruba cu a logra hopi a base di un lucha cu sacrificionan grandi, pero principalmente pa su amor pa nos dushi Aruba.”
