Oranjestad-Aruba
E ta un echo irefutabel cu desde nos Status Aparte no ta existi un gobierno cu a haci mas pa drecha nos finansas publico cu Gabinete Wever-Croes. Riba area di impuesto Evelyn y Xiomara a esforsa nan mes pa modernisa nos sistema di impuesto, incluyendo un transicion for di dependencia riba impuestonan directo (manera loonbelasting y grondbelasting), pa un enfasis riba impuesto indirecto manera BBO. Nan a purba combina cada paso di e reforma cu un compensacion adecua, demostrando consciencia di e impacto a corto y largo plaso pa pueblo.
Mike Eman a critica e combinacion aki di reforma y compensacion, bisando: MEP ta duna bo 10 florin, kita 100. Gerlien a bin su tras, bisando: MEP ta duna bo 10 florin, kita 1000. Nan no a uza e atake aki mucho, pasobra nan ta reconoce e esfuerso pa trece cambio na un manera prudente. P’esey nan tabata prefera e atake cu MEP a goberna 7 aña cu medida, hincando man den cartera di pueblo, masacrando nos pueblo y causando pobresa. Dunando pueblo asina un cocktail venenoso di instagacion, desinformacion y materialismo desenfrena.
E engaño di Dello
Awo abogado Dello Gomez kier sirbi pueblo e mesun cocktail aki di Mike cu Gerlien. Den un articulo publica dia 13 di januari 2025 riba 24ora Dello ta critica e reduccion di e tarifa di inkomstenbelasting y loonbelasting. Segun Dello e reduccion aki no ta pas den e maneho di Gabinete Wever-Croes cu supuestamente tabata enfoca riba yena caha di gobierno. Dello ta uza e introduccion di un DGA-regeling na 2023 pa crea e aparencia di logica pa su ponencianan, bisando lo siguiente: “Den un esfuerso pa aumenta e entradanan di belasting, gobierno a anuncia un maneho nobo entrante 1 di januari 2023, asignando un salario fictivo di 48.000 florin pa aña na tur director di compania.”
Pero Dello ta gaña, pasobra e meta di e DGA-regeling no tabata e aumento di entrada di gobierno. Su meta tabata pa combati triki y trampa di parti di director-accionista (directeur-grootaandeelhouder of DGA) pa scapa di paga impuesto. Impuesto cu pueblo si mester cumpli cu ne.
Triki y trampa di inversionista
Pa compronde e triki y trampa, nos mester analisa dos beneficio cu e sistema legal ta brinda inversionista. E prome beneficio ta e posibilidad pa uza un structura legal di un NV (of un VBA). E NV ta un persona ficticio, esey kiermen cu ley ta trata un NV como un persona normal di carni y weso. Un NV por cera contract, paga impuesto of bay corte mescos cu un persona normal. Si e NV ta haya su mes den problema financiero tur hende mester deal cu e NV mes. Hende no por bati na porta di e inversionista cu a hinca placa den e NV. E unico riesgo cu e inversionista ta core ta cu e por perde e suma cu el a hinca den e accionnan. Pero, e inversionista no ta perde su cas, auto etc. E di dos beneficio cu e accionista ta haya ta e derecho riba e ganashi di e NV. Riba e ganashi cu e accionista ta haya (dividendo), e mester paga dividendbelasting. E impuesto aki ta mas abao cu loonbelasting.
E accionista tin otro responsabilidad y obligacionnan tambe. Un di responsabilidadnan ey ta cu e accionista mester supervisa e director bon, pa e director no echa baina cu e placa di e compania. Asina e control di e accionista ta evita cu e director ta perhudica e empleadonan, clientenan y departamento di impuesto.
E asunto por complica ora cu e accionista principal ta alabes e director di e compania (directeur-grootaandeelhouder of DGA). Den e caso ey e control no por tuma luga. Ta con e director-accionista ta bay controla su mes? Asina e riesgo ta surgi cu e director ta busca manera pa scapa di su obligacion di paga impuesto. Tabatin dos triki cu e director-accionista por haci pa evadi loonbelasting. E prome triki tabata pa keda sin paga su mes ningun salario. E director, pasobra e ta accionista tambe, tabata saca dividendo so. E motibo ta cu e dividendbelasting ta mas abao cu loonbelasting. E di dos triki tabata pa laga e NV gaña duna e director-accionista un prestamo. Nunca tabatin e intencion real pa cobra e prestamo bek. Asina e director tabata scapa di tanto e loonbelasting como e dividendbelasting.
Dello mester stop cu triki y trampa
Enfin, Dello ta compronde cu Gabinete Wever-Croes a introduci un DGA-regeling na 2023 como un anti-misbruikbepaling den articulo 6a Lv loonbelasting. E meta tabata pa un director-accionista no abusa di e sistema y paga su mes un salario serio. Asina e ley ta combati un inhusticia pa cu e pueblo trahado y un custumber cu ta crea competencia inhusto cu ta afecta nos economia. Si e ley ta efectivo awe, un di e efectonan secundario ta mas placa den caha di gobierno pa inverti den enseñansa, cuido y subsidionan social. Pero, bende esey manera e meta principal di e ley ta simplemente un engaño diseña pa pinta Evelyn y Xiomara como gobernantenan inepto y haragan pa placa.
Dello, stop di bruha tera, pasobra e berdad ta simpel: reformanan fiscal ta traha. Berdad hopi abogado ta basa nan carera riba mentira. Sinembargo bo sa cu segun etica profesional pueblo mester por confia cu un abogado ta honesto y cu e ta pone berdad riba un pedestal. Esaki no ta conta solamente ora bo ta representa bo clientenan, pero tambe ora bo kier briya como experto riba e plataforma cu mas esfuerso ta haci pa normalisa corupcion y mina nos estado di derecho.
