Despues di 4 aña, Heart-Centered Leadership Foundation (HCLF) ta trece bek su podcast di hoben pa hoben “VOX: voice of youth making an impact”
HCLF ta kere den e balor di brinda hobennan un plataforma unda nan por uza nan bos pa inspira y crea un impacto. Un di e maneranan cu HCLF ta traha riba esaki ta cu su podcast pa hoben. Na final di 2019, HCLF a lansa e podcast VOX cu meta pa amplia e bos di hoben y stimula nan participacion den temanan cu ta importante. E aña aki HCLF ta trece e podcast bek cu un concepto nobo y ta en busca di hobennan cu lo kier forma parti di e podcast: sea dilanti camera of patras. Pa hobennan, esaki ta un oportunidad pa desaroya diferente habilidad, entre otro engrandece nan confiansa pa expresa nan mes of uza nan talento of pasion pa traha cu camera, sonido y filmacion di e podcast.
HCLF ta den su fase di preparacion y ta haci un invitacion pa hobennan cu ta interesa den forma parti di e podcast pa un sesion tipo “think tank”. Durante e sesion aki, nan lo por conoce e concepto di e podcast di cerca, comparti nan ideanan riba e topiconan di e temporada nobo, y siña con por forma parti di e produccion di e podcast VOX. Hobennan y hobennan adulto di 13 pa 30 aña por participa den e sesion ‘think tank’.
E sesion ‘think tank’i ta tuma luga diabierna, 24 di januari 2025 na Teresita Center, di 10:00 am pa 12:30 pm. Participacioni ta completamente gratis. Hobennan cu ta interesa di forma parti di e sesion por registra door di manda HCLF un whatsapp na +297 5841211 of via HCLF su website www.hclfaruba.org/our-events
Tocante HCLF:
HCLF ta un fundacion cu a keda estableci na 2008 cu e meta pa inspira y empodera hobennan di Aruba. Desde 2012 e fundacion ta ofrece diferente tayer, actividad y programanan impactante unda hobennan ta sera conoce nan mes miho y traha riba nan desaroyo personal y profesional.
