Minister David van Weel di Husticia y Siguridad ta realisa di 12 te cu 17 di januari un bishita di trabou na Boneiro, Aruba y Corsou. E bishita tin como meta pa cera conoci y fortifica e cooperacion cu diferente partner hudicial y administrativo den e parti Caribense di Reino riba tereno di mantencion di ley y siguridad.
Boneiro
E minister ta cuminsa su bishita di trabou na Boneiro, caminda e ta cera conoci cu Gezaghebber John Soliano y Colegio Ehecutivo. Tambe e ta hiba combersacion cu diferente servicio hudicial, incluyendo Ministerio Publico BES, Koninklijke Marechaussee, Cuerpo Policial Hulanda Caribense, Cuerpo di Bombero Hulanda Caribense y Instituto Hudicial Hulanda Caribense. Tambe e ta papia cu Representante di Reino interino Jan Helmond. Lo pone Minister Van Weel na altura di desaroyo- y retonan actual riba e isla. E ta realisa un bishita tambe na e Centro Regional di Informacion y Experticio Hulanda Caribense (RIEC CN).
Aruba
Despues di Boneiro minister Van Weel lo biaha pa Aruba. Riba programa tin encuentronan cu Gobernador di Aruba, Prome Minister y Minister di Husticia y Asuntonan Social. Ademas e ta bishita e representacion di Hulanda na Oranjestad y Cuerpo Policial Aruba. Aki e ta cera conoci cu Hefe di Cuerpo Ramon Arnhem y e ta realisa un bishita na e cuerpo riba trabou.
Ademas tin riba agenda un bishita na e instalacion pa kima droga y e sistema di radar. E bishitanan aki tin como meta pa compronde miho e acercamento local pa combatimento di droga y siguridad maritimo.
Corsou
Ta clousura e bishita di trabou na Corsou. Minister Van Weel ta cuminsa aki cu un bishita na Recherche Samenwerkingsteam y warda di polis. Tambe e ta papia cu Consul General di Merca y e ta realisa un bishita na e ‘snoa’ historico di Corsou.
E bishita di trabou ta subraya importancia di un cooperacion fuerte den Reino pa conhuntamente garantisa mantencion di ley y siguridad.