Aruba, 9 di januari 2025
Ora Patrick kier, e por ta un periodista serio. Pero, ta parce cu riba cierto area e simplemente no kier ta serio. E ora ey Patrick ta scohe un caminda cu ta dun’e un refleho di un gangster mafioso un tiki chikito y un tiki gordo. Imagina Patrick sinta riba un stoel mucho grandi p’e. Su pianan ta colga tras di e lessenaar grandi. E ta bisti c’un bachi scur bon na midi, c’un camisa blanco y un corbata berde scur. Puro elegansia sin exageracion. Un siga den su boca, cu e huma cu ta subi suavemente. Naturalmente cu’n glas di whiskey banda di dje. Claro cu esey ta den joke, pero e imagen aki di delincuente elocuente no ta mucho leu di e berdad, pasobra Patrick su trabao ta refleha un mentalidad di bandido.
A cambio nos tur por imagina Tito Laclé sinta tras di su desk, cu su laptop cu su carson kaki y su camisa nechi — proyectando un aura di competencia y credibilidad. Su postura ta stret y atento, cla pa capta tur detaye. Sea cu ta un conferencia di prensa of den su studio di noticia, su comportacion semper ta trankil y concentra, reflehando su compromiso pa duna informacion exacto y di impacto. Su meta: informa y inspira su publico. Y aunke tin hende cu kier politisa Tito, e realidad ta cu e ta un ehempel di un periodista motiva pa descubri e berdad y responsabilisa gobernantenan sin importa nan color politico. “Keeping them honest”, manera Tito ta bisa. Djis analisa su relatonan. Ta p’esey e mayoria di intelectual na Aruba ta gusta lesa material di Tito.
Sin periodismo serio nos no por tin ni paz ni prosperidad
Un mentalidad periodistico serio ta importante. Pasobra, sin periodismo serio e clase trahado no por eleva for di pobresa. Pa nos pais alcansa e nivel di exito manera un Hulanda of cualkier pais cu ta prospera, nos mester fomenta etica periodistico. P’esey e ta un tragedia cu Patrick ta anuncia den Enfoke cu despues di hopi reflexion su new year’s resolution ta cu 24ora lo sigui cu bullying, pero mas suave. E mentalidad ey ta full fout, pasobra uzo di un plataforma di prensa pa bullying y fomenta odio ta un acto criminal contra pueblo.
Etica periodistico ta cuminsa cu pone berdad riba un pedestal. Esaki ta nifica cu e periodista mester esforsa su mes pa colecta informacion exacto, verifica su fuentenan y present’e di un manera husto y obhetivo. Esey ta un prensa cu por formula critica fuerte, pero constructivo. Esey ta un prensa cu por forsa cambio positivo den gobierno y parlamento. Esey ta un prensa cu ta informa pueblo honestamente, yudando e ciudadano haci uzo responsabel di su derecho di voto.
Tanto bullying como violencia fisico ta malo pa comunidad
Periodismo etico a bira mas actual cu nunca, despues di e incidente cu a tuma luga diabierna dia 3 di januari 2025, unda e yiu di Endy a agredi Speed den un hanchi banda di Bohemian restaurant. Tin hopi angulo pa analisa e sucedido aki, pero den tur scenario nos mester reconoce cu 24ora ta e plataforma di mas grandi, poniendo un responsabilidad mas pisa riba lomba di Mark, Patrick cu Speed. Esey kiermen cu na momento cu tin un conflicto entre Endy y Edmond na un banda y Patrick cu Speed na e otro, e responsabilidad pa desescala e situacion ta pisa mas pisa riba schouder di Patrick cu Speed. P’esey e ta grave cu Patrick no ta dispuesto pa stop e bullying y solamente kier bay un tiki mas suave. Ta comosifuera cu Patrick no ta worry cu si e pusha palo bao di un conflicto verbal, e chens ta grandi cu e conflicto ta escala y coy mas candela. P’esey nos ta scucha den pueblo ta bisa cu Patrick mes ta busca un wanta.
Naturalmente pueblo ta compronde cu cada un di nos ta carga responsabilidad pa loke nos mes ta haci. Esey ta conta pa e yiu di Endy tambe. E responsabilidad ey ta conta mas ainda si bo ta practica cualkier deporte di combate, manera e yiu di Endy. Pero, tambe ta importante pa reconoce cu e emocion profundo cu ta crece cerca un yiu ora cu e ta mira un conflicto verbal prolonga, unda cu hende ta papia yen soketada di su famia, ta fomenta un sentimento di impotencia pa cu e inhusticia di e situacion. Hopi biaha e sentimento ey ta escala na violencia fisico. Pero e violencia aki no ta resolve e atake riba e dignidad di bo sernan keri. Mas bien e ta empeora e situacion, pasobra violencia ta atacha e dignidad y integridad fisico di un otro ser humano. Esey ta hiba nos pais den un abismo mas profundo. P’esey ta miho pa nos fomenta un cultura cu ta reconoce e dignidad di cada persona y periodismo etico tin un rol importante pa realisa e cultura di respet ey.
24ora a escala e conflicto cu Endy
P’esey nos mester critica e postura publico di Patrick, pasobra e ta sigui causa daño na nos pais. Diamars dia 7 di januari 2025 mi a mira un reel unda Patrick ta zundra: “Evelyn Wever-Croes, abo ta keda keto, bo no a keur af Endy su yiunan, su yiunan malandron’ey. Tanten cu bo no keur e af, no invita mi pa nada. Mi no ta bin. Mi ta bisa bo publicamente. Mi kier warda MEP keur e af. Y si MEP no keur e af, esey kiermen cu e ta e modus operandi. Kiermen e ora ey nos tambe por bisa hend’i AVP: “asina nos ta bay regla e cos cu hend’i MEP.” Bo n’ kier toch? E n’ ta leuk. Awel, e ora ey bo mester sali keur e af.”
Patrick ta un tata y e sa cu loke ta mas sagrado pa un tata ta su yiunan. P’esey Patrick ta comete conscientemente un acto di violencia verbal contra Endy ora e ta yama su yiunan pa malandro. Ademas, e acusacion ta resulta completamente hipocrita, pasobra Patrick ta rondona pa tres colega cu ta delincuente convicto pa corupcion y soborno. Comosifuera poco Patrick ta promove AVP, mientras AVP mes tambe tin dos lider prominente convicto pa corupcion y soborno. Pa colmo Mike Eman no kier tuma responsabilidad pa e corupcion cometi bao di e bandera berde y number 1 riba lista, Wendrick Cecilia, ta campaña keto bay cu e tin su mannan limpi.
Patrick su mentalidad di “nos contra nan”
Si Patrick realmente lo a reflexiona, e lo a ripara cu su palabranan ta sigui polarisa y pusha palo bao di candela. En bes di ta describi e incidente cu Speed como un asunto entre dos persona, Patrick ta fomenta un guera entre activistanam di MEP y AVP, door di menasa cu si partido MEP no desaproba e acto di yiu di Endy, Patrick tin e poder pa pidi AVP tuma represaya: “Kiermen e ora ey nos tambe por bisa hend’i AVP: asina nos ta bay regla e cos cu hend’i MEP.” Ta asina aki Patrick ta confirma cu e ta sinti su mes parti di e tribo di AVP. Pero, e sentimento tribal ey no ta normal pa un periodista imparcial. E sentimento tribal ey ta algo normal den un gang mafioso.
E mentalidad di gang di Patrick ainda ta bay mas leu.E kier pone culpabilidad colectivo riba MEP pa e acto di un persona individual cu no ta forma parti di e liderazgo di MEP: “Esey kiermen cu e ta e modus operandi.” Asina aki Partrick ta insinua cu e yiu di Endy a actua riba instruccion di MEP y cu su acto ta refleha un caracter criminal di MEP. Esaki ta mentalidad di bandido, unda henter un grupo ta wordo teni responsabel pa un acto di un yiu di un miembro.
Claro, nos mester tene cuenta cu Patrick ta bisa e cosnan aki den un estado emocional. Pero hustamente den e momentonan asina nos ta mira un persona sin su mascara. P’esey e menasa di Patrick cu e no lo colabora of dialoga cu MEP (“Mi no ta bin. Mi ta bisa bo publicamente”) ta mas evidencia di Patrick su deseo pa sigui fomenta polarisacion entre MEP y AVP.
Conclusion
P’esey mi kier apela cerca Patrick pa e reflexiona di berdad, pa e haya e periodista honesto cu ta skondi somewhere den su alma. Reflexiona pa berdaderamente compronde cu nos niun ta husto ni perfecto. E ora ey e lo reconoce e necesidad pa pidi forsa pa bandona tur tendencia pa polarisa, menasa y fomenta tensionnan politico. Pidi forsa pa e yuda elemina e ciclo di enemistad entre MEP y AVP, door di promove e berdad y responsabilidad. Y finalmente: pidi forsa pa e cuminsa para na banda di husticia y un periodismo etico.