ORANJESTAD – Entrante 1 di januari 2025 lo tin cambio den e tarifa di inkomstenbelasting y loonbelasting. Manera conoci e mesun tarifa cu ta valido pa inkomstenbelasting ta valido tambe pa loonbelasting. E tarifa aki ta hopi importante tanto pa e persona priva, doño di trabou y comerciante cu tin empresa propio. E cambio ta encera un reduccion di e actual tarifa, cual ta nifica cu mayoría di e contribuyentenan lo bay paga menos inkomstenbelasting y loonbelasting den aña 2025. Specialmente e clase trahado lo bay ripara cu su doño di trabou lo bay retene menos loonbelasting durante 2025 compara cu 2024 y asina e empleado lo ricibi un suma di salario mas halto den su man.
Pa loke ta e suma liber di impuesto, esaki ta keda Afl. 30.000.
Consideracionnan
E reduccion di tarifa a keda aproba door di Gobierno di Aruba pa por yuda mas tanto persona posibel specialmente esnan mas vulnerabel den comunidad, esta e clase trahado.. Reduccion di e tarifa, lo trece alivio den e poder di compra y lo contribui tambe pa mantene noseconomia stabiel.
E tabel nobo di inkomstenbelasting/loonbelasting 2025
E tabel nobo di inkomstenbelasting/loonbelasting 2025 ta como lo siguiente:
| Na un entrada di mas cu e suma menciona den kolom I, pero no mas cu e suma menciona den kolom II, | e suma di impuesto ta bira e suma menciona den kolom III hunto cu e suma calcula a base di e porcentahe menciona den kolom IV.
Ta calcula e porcentahe riba e parti di entrada cu ta surpasa e suma menciona den kolom I. |
|||
| 1.
2. 3. 4. |
I
– 34.930 63.904 135.527 |
II
34.930 63.904 135.527 – |
III
0,00 0,00 6.084,54 36.166,20 |
IV
0,00% 21,00% 42,00% 52,00% |
Splicacion di e cambionan
| Suma liber di impuesto (belastingvrije som) | Afl. 30.000 |
| Categoria di entrada (inkomensschijven) | – Pa categoria di entrada 1 ta reduci e porcentahe menciona den kolom IV te na 0% (esaki tawata 10%).
– Pa categoria di entrada 2 no tin cambio. – Pa categoria di entrada 3 ta reduci e suma den kolom III te na Afl. 6.084,54 (esaki tawata Afl. 9.577,33). – Pa categoria di entrada 4 ta reduci e suma den kolom III te na Afl. 36.166,20 (esaki tawata Afl. 39.659,20). |
E suma liber di impuesto ta nifica cu tur persona priva of comerciantenan cu tin empresa propio (eenmanszaak) y cu tin un entrada fiscal te cu Afl. 30.000 pa aña, lo no paga inkomstenbelasting y loonbelasting.
Con ta haci e calculacion di impuesto?
Aki ta sigui un splicacion di e forma cu ta calcula e suma di impuesto.
∙ Prome cu aplica e tabel pa calcula e suma di impuesto mester deduci e suma liber di impuesto (belastingvrije som) di Afl 30.000.
∙ Na final ta haci e suma di impuesto cu a wordo calcula, un suma cera.
Ehempel:
Entrada fiscal Afl. 78.864
Suma liber di impuesto Afl. 30.000 -/-
Entrada riba cual ta aplica e tabel Afl. 48.864 🡪 mira categoria di entrada nr. 2 Kita suma di kolom I (categoria 2) Afl. 34.930 -/-
Saldo Afl. 13.934
Impuesto riba Afl. 34.930 segun kolom III (categoria 2) Afl. 0,00
Impuesto riba Afl. 13.934 🡪 21% segun kolom IV Afl. 2.926,14
Suma total di impuesto Afl. 2.926,14
Inkomstenbelasting of loonbelasting cu mester paga Afl. 2.926 (pa aña)
Departamento di Impuesto tin un calculator den forma di un MS Excel file cual e contribuyentenan por uza pa calcula e suma di inkomstenbelasting of loonbelasting automaticamente. E file aki yama ‘Calculator inkomstenbelasting/loonbelasting 2025’ y por baha esaki di e website www.impuesto.aw.
Ta importante pa un y tur, specialmente e doñonan di trabou cu tin cu prepara payroll di nan empleadonan durante aña 2025, pa aplica e tabel di tarifa nobo di inkomstenbelasting y loonbelasting.
Gerencia di Departamento di Impuesto
7 di januari 2025