Gabinete nobo, (EMAN-CROES) ta formando, ta canando su caminda. AVP sigur un Partido cu ta trahando duro pa realisa esaki, pa asina por cumpli cu su promesa di campanja, pasobra priminti ta mas cu debe.
E promesa cu lider di AVP a haci despues di eleccion, sigur lo keda e prioridad mas grandi no solamente pa e votadonan di AVP so, pero sigur pa Aruba.
Lider maximo di AVP, sr. Mike Eman, a priminti Aruba publicamente cu den 100 dia tur pensionado lo bay ricibi e aumento di 700 florin riba nan pensioen actual. Den 100 dia lo negocia e 900 miyon di debe pa convertie den inversion pa Aruba. E promesa di remedi ya caba a wordo gefix pa e Gobierno actual di MEP y Raiz, cual Geoffrey Wever di Futuro ainda ta Minister. E otro dos promesanan a keda pa e lider di Partido sr. Mike Eman pa cumpli cune, pues e aumento di 700 florin den 100 di dia gobernacion, cual lo ta un alivio pa e pensioenadonan, sigur pa tur cu a dune nan confianza dia 06 di December 2024. E otro promesa di bay inverti 900 miyon na Aruba, no ta full duidelijk ainda, den kiko tur lo bay inverti e 900 miyon aki, pero cu tempo lo sali na cla.
Diadomingo ultimo AVP a tene un seminario cu tur su candidatonan y conseheronan pa prepara e reunionnan cu lo bay tin cu FUTURO pa forma un gobierno.
Segun AVP e simannan nos dilanti e dos partidonan aki lo sinta hunto pa delibera mas extenso riba contenido di e Gobierno nobo pa asina forma e Gobierno nobo aki cu lo ta di 2025 pa 2028.
Durante e seminario esnan presente a papia di forma un gobierno solido, cu un programa di gobernacion cu tin prioridad di ambos Partido.
Durante e prome parti papia di e principionna di Christian Democrata, a papia di un desaroyo Social economico y tambe di e ideologia Social Christian. Segun AVP nan lo bay traha pa hisa e forsa di compra, cu segun e Partido a cay. E necesidad pa un maneho pa un Aruba mas sostenibel a largo plazo, AVP a escoge pa un maneho social y economico di renobacion structural.
Den e di dos parti e candidatonan a studia y pa asina compronde bon e programanan di ambos Partido, di AVP y FUTURO. Nan a compara e programanan y mas documentonan di AVP. Segun e Partido pa tin un bon dialogo entre AVP y FUTURO, tur candidato y tur consehero di AVP mester por compronde e contenido di e programanan, e pensamentonan tras di e program y tambe e prioridadnan di e partidonan.
Segun AVP door di tene e seminario aki. di percura pa tur participante ta compronde e pensamento di tras di e programa di e dos partidonan miho, ta mustra e seriedad cu cual AVP ta atende cu e proceso di formacion.
Den e seminario aki e accento a wordo poni riba ‘dialogo’ pa yega na e programa final cu ambos Partido por sostene.
Sigur mester duna e dos partidonan tempo pa dialoga y yega na otro pa forma un gobierno solido y sigur nan lo mester por cumpli cu e prioridadnan, especialmente e promesanan cu pueblo fielmente a vota pe.
