E dos sospechosonan ta nenga – 7 aña di prison exigi den caso di traficacion di hende cu 4 morto na Vader Piet

ORANJESTAD – E hombernan Venezolano Y.R. y E.D.S. awe mainta a presenta den Corte pa e caso penal cu Ministerio Publico a cuminsa contra nan.

POLIS ALERTA PA BOTO CU ILEGAL

Hues a mustra cu segun e procesverbaal di Polis, a haya notificacion anonimo cu dia 10 December 2023 lo bin un boto for di Venezuela cu 7 persona y algun di nan lo bin cu intension di haci asalto. Esey a haci cu Polis tabata alerta pa cualkier movecion riba laman. Dia 10 December 2023, Polis a haya notificacion cu 5 di esnan di e boto a yega tera y ta keda na un cas na Weg Fontein. Polis a bay mesora na e cas y topa cu nan cu paña muha. Entre nan tabatin un mucha tambe. A detene tur hende pa cuminsa cu un investigacion. Polis a haci investigacion riba telefoon di e dama M. cu ta biba na e cas. Ta asina cu asina cu e 5 personanan a presenta na e dama M. su cas, el a yama 2 persona pa notifica nan.

4 CURPA TA DRIEF NA VADER PIET

Hues a sigui bisa cu segun e relato di Polis, dia 11 December 2023, Polis a worde notifica cu a haya curpa ta drief na Vader Piet. Polis a bay na e beach na Vader Piet y a bin haya 4 curpa, dos dama y dos homber sin bida. Investigacion ta mustra cu entre e 5 personanan cu a yega na e cas na Weg Fontein tabata e sospechoso D.S.

Investigacion a pone cu Polis a bay detene Y.R., como sospechoso doño di e boto cu a trece e ilegalnan. Ta asina cu Polis a scucha e testigonan y tambe a scucha yamadanan cu ta mustra cu Y.R. ta sospechoso. Y.R. a wordo deteni y a wordo interoga pa Polis. Segun Y.R., e unico cos cu e ta envolvi, ta pa ricibi un cuña. Ta asina cu e cuña tabata un di e curpanan cu a haya ta drief na Vader Piet. For di e interogacion por a compronde cu un di e naufragonan G. a haya estadia serca Y.R. Segun Y.R. ta dos persona e lo bay duna cu estadia esta su cuña y G.

SOSPECHOSO TA NENGA DI A PREPARA TRAFICACION

Hues a mustra cu Polis ta sospecha cu Y.R. ta esun cu lo a yuda den preparacion di e viahe. Y.R. a bisa Hues cu el a conseha su cuña pa busca un persona cu por yuda nan haya un lancha cu motor cu por viaha di Venezuela bin Aruba. El a desmenti cu el a bisa ki tipo di lancha y motor lo mester busca. Ta asina Y.R. ta un piscador. Y.R. tabata sa cu un homber D., kende ta conoci di dje na Venezuela, tin un boto cla pa navega. Segun Y.R., el a papia cu D., cu ta un famia di dje, cu tin hende cu ta interesa den cumpra su boto. Y.R. a bisa cu e no sa ki tipo di boto D. tin. El a bisa cu e tabata na Aruba y su cuña a bay regla cu D. Hues a puntra Y.R. si el a puntra su ruman muher na Venezuela pa busca 6 persona pa hiba na e lugar caminda e boto lo sali pa bin Aruba. Y.R. a desmenti esey. Hues a mustra cu den interogacion di Y.R. ta para asina. Segun Y.R. esey no ta berdad. Hues a bisa cu segun investigacion Y.R. lo mester a busca su cuña y e hombernan G. y J. Segun Y.R. e lo mester ricibi su cuña y e homber G. El a bisa Hues cu nan ta su famia. Hues a puntra si Y.R. a haya placa pa e transporte di e hendenan. Segun Y.R. e no a ricibi nada. Hues a mustra cu Y.R. a manda 500 dollar Venezuela pa e cuña por viaha bin Aruba. Y.R. a reacciona cu el a manda placa pa su cuña pero e placa ta pa su yiunan. El a bisa Hues cu loke Polis ta skirbi no ta cuadra cu e berdad. Hues a bisa Y.R., cu el a firma su declaracion na Polis.

Hues ta mustra cu tin un combersacion via chat cu ta 50 hende lo bin. Hues a mustra cu Y.R. a bisa cu e boto lo a costa 1800 dollar, e motor 1650 dollar y 200 dollar di gasoline. Y.R. a desmenti di a bisa esey na Polis. Y.R. a bisa cu e no tin nada di haci cu e transporte y preparacion. E solamente mester a ricibi 2 persona. El a bisa cu otro 2 famia di esnan cu a fayece ta culpa Y.R. di tur esaki siendo cu e solamente mester a ricibi 2 hende. El a bisa cu e caso aki ta duele pasobra ta su famia.

SOSPECHOSO TA NENGA DI TABATA CAPITAN

Hues a sigui cu D.S.. El a bisa cu Y.R. a menciona cu un tal Chibo lo ta e capitan. Ta resulta cu D.S. ta Chibo. Tin naufragonan cu a reconoce D.S. como e capitan. D.S. a declara na Polis cu 10 December 2023 el a navega y tabatin 11 persona abordo di e lancha. Segun D.S. tabatin 2 hende mas, un para mey mey den e lancha y e capitan. En total 13 persona. Segun D.S., un tal Toto ta doño di e lancha y Guito ta omo di Toto. Toto tabata na Aruba, wardando e boto. Hues a mustra cu na Polis D.S. a bisa cu C. a pidi’e pa yuda prepara. D.S. a desmenti esaki dilanti Hues. El a nenga di a yuda di busca un motor pa e boto. Hues a bisa cu esey ta para den declaracion di D.S. Segun D.S., e no a declara esey. Hues a bisa cu D.S. a bisa cu e boto a bolter door di un ola grandi. D.S. a bisa Hues cu e lancha tabata chikito pa e cantidad di hende. El a bisa cu ora nan a sali for di Venezuela, e laman tabata trankil. El a bisa cu door di e situacion na Venezuela, el a bin Aruba. El a desmenti di a navega e boto. Hues a mustra cu na Polis, el a bisa cu e promer mey ora di navegacion, el a navega e boto pasobra e capitan kier a huma. Segun D.S. e no ta responsabel pa nada cu a pasa pasobra e no a haya ningun cen. El a bisa Polis cu el a yuda e capitan den cambia e slang di tanki di gasoline ora cu e tanki di gasoline bira bashi. D.S. a bisa cu el a paga 800 dollar pa por a viaha bin Aruba. Segun D.S., e prijs tabata 1000 dollar pero e dama, kende tambe a fayece den laman, a accepta 800 dollar. El a sigui bisa cu un tal Guito tabata e capitan di e lancha. Hues a bisa cu segun declaracion di otronan, D.S. tambe tabata capitan. El a desmenti esey.

D.S. a bisa cu ora el a yega Aruba, famia di esnan cu a fayece, a secuestr’e y maltrat’e pa e bisa cu e tabata e capitan di e boto. Segun D.S., Guito ta e capitan y cu Guito lo a muda pa otro lugar y e no sa nada di dje. El a bisa cu e ta sinti’e malo cu nan ta culp’e di e disaster siendo cu el a bin Aruba pa traha y no tin nada di haci cu e caso.

FISCAL A EXIGI 7 AÑA DI PRISON

Fiscal a bisa cu a haya 4 curpa na costa di Aruba. Un di e curpanan no por a identifica pasobra pisca lo a come partinan di e curpa. A haya 5 hende na un cas na Weg Fontein. Nan a declara cu e boto a bolter y nan a logra yega tera. Fiscal a bisa cu e no ta kere Y.R. cu e no tin nada di haci cu e caso. Segun Fiscal, tin combersacion via chat cu ta mustra cu Y.R. tabata duna instruccion ki tipo di boto lo mester usa y motor. Tambe cu el a manda placa pa yuda e cuña cumpra e boto. Segun Fiscal, tur esaki Y.R. lo a declara na Polis. El a mustra cu segun Y.R., ta D.S. tabata e capitan. Fiscal a bisa cu traficacion di hende ta un asunto serio. Den e caso aki, e boto a bolter y 4 hende a muri. Entre e hendenan den e boto,  tabatin un mucha cu a logra yega tera. Fiscal a mustra riba sentencia di Hof cu a confirma 5 aña di prison pa traficacion di hende caminda 1 persona a fayece. Pa cu e castigo, Fiscal a bisa cu e ta tene cuenta cu D.S. tabata riba e boto y Y.R. a perde un familiar. Fiscal ta haya cu Y.R. tabatin un funcion importante den e organizacion y D.S. tabata e capitan. El a exigi 7 aña di prison pa tur dos.

ABOGADO

Abogado mr. Edwards di Y.R. a bisa Hues cu ta acusa su cliente di a trafica hende pa haya ganashi. Esey no ta cuadra cu e realidad. E abogado a bisa cu Y.R. no a haci nada pa haya ganashi sino a yuda pa tuma su cuña ora e bin Aruba. E hecho cu el a manda 500 dollar pa su cuña ta pa Y.R. su yiunan y no pa yuda paga e navegacion, manera ta pretende. Na opinion di e abogado, ta famianan di e otronan a haci trabaonan pa por logra haci e navegacion. E abogado a mustra cu tin combersacion chat entre Toto y un tal L. caminda por mira cu tabatin preparacionnan amplio pa e viahe. 1 December 2023 nan tabata papia con lo mester haci e navegacion y cu tin helicopter ta bula. Tambe cu ta na altura di e molinanan grandi na Aruba, lo mester drenta. Na opinion di abogado mr. Edwards, den tur esakinan no ta menciona nada di Y.R. E ta haya cu mester declara Y.R. liber di e acusacion. E ta haya e castigo exigi pa Fiscal ta hopi exagera.

Abogado mr. Zara a bisa Hues cu su cliente D.S. mester wordo declara liber pa e disaster cu a sosode cu e traficacion di hende. E abogado a bisa Hues cu mester mira D.S. como un pasahero den e lancha y no como e capitan.. El a paga 800 dollar pa viaha y a keda debe 200 dollar. Na opinion di abogado, D.S. no ta envolvi den e planeamento di e navegacion y ningun momento D.S. a ricibi placa. Mr. Zara a sigui bisa cu D.S. a nenga cu e ta capitan. El a wordo secuestra na Aruba y maltrata pa famia di algun di esnan cu a fayece, pa e tuma culpa di capitan. E abogado a bisa cu D.S. a bin Aruba pa traha y no a yuda cu e preparacion di e viahe y mucho menos tabata capitan. D.S. ta un piscador y a mira cu e laman ta calmo y pesey a dicidi di bin Aruba. Na opinion di mr. Zara, no por condena D.S. E ta haya cu Fiscal ta exigi castigo exagera.

Hues a bisa cu 10 Januari 2025 e lo sera tratamento di e caso y di biaha lo dicta sentencia pa 8.15 di mainta.