MACUARIMA, ARUBA: E ta mas cu un honor pa brinda e respet como tambe balora personanan cu a destaca den nan carera Policial den Cuerpo Policial Aruba. Cu un carera excepcional y largo como tambe un di e personanan cu a carga KPA, prome y despues di Status Aparte a tuma despedida di Cuerpo Policial Aruba, Mr. Eddy Ras.
Mr. Ras no ta desconoci den comunidad n’i tampoco den Cuerpo Policial Aruba. Mr. Ras a drenta Cuerpo Policial Antiyas Hulandes riba 1 september 1982. Despues di a termina su estudio policial e tempo ey, ela bishita y haya experiencia na diferente departamento policial, manera departamento di trafico, Motor Unit pero tambe na Joyriding Team. Ela forma parti tambe di e team di Mobiele Eenheid pa 25 aña largo.
Despues di Status Aparte:
Mr. Ras conhuntamente cu algun polis mas riba 1 januari 1986 a carga y lanta Cuerpo Policial Aruba pa prome bez cu solamente 200 polis cu a dicidi di keda Aruba y brinda e seguridad como e Pais Autonomo den Reino Hulandes. Un experiencia cu Mr. Ras mes a bisa tabata un experiencia unico y cu orguyo pa lanta tur dia y carga e bandera di Pais Aruba despues di aña 86.
Mr.Ras su motivacion nunca no a bay y semper tin mas cos pa haci y metanan pa logra. Cu su caracter humoristico pero serio den su trabou Mr. Ras a gana e respet den KPA pero tambe den comunidad. E ultimo 25 aña e tabata meneer di scol na Scol di Polis E.J. Watty Vos. Pa Mr. Ras e tabata un honor pa lanta y guia e studiantenan pa e siguiente generacion di KPA.
Mensahe:
“Duna lo mihor di bo, cu respet pero tambe traha duro pa logra bo meta pero corda riba bo mes, bo salud y bo famia. Tuma tur estudio of curso pa sigui desaroya bo mes” Tabata palabranan di Mr.Ras cu e ta laga atras como mensahe pa e coleganan.
Despedida:
Como sorpresa na Centro di Bario Brazil a organisa un encuentro chiquito hunto cu su famia blauw como tambe su famia, casa y yiunan pa su despedida. Altocomisario di Polis, drs. Ramon Arnhem tambe tabata tey presenta y gradici Mr.Ras cu tur honor y respet pa su 42 aña. Bou di música y amigonan a recorda e bon momentonan como tambe momentonan difícil y un bunita carera policial excepcional di un gran Polis cu tur respet y honor. Nos ta desea Mr. Ras un bon y un dushi vakantie largo y bon mereci, Aruba ta orguyoso di bo y danki pa haci un diferencia y brinda e sosten pa un Pais cu bo a mira ta crece danki na abo como pionero policial!
