Noord Kust – Boca keto
Diadomingo den oranan di mainta, momento cu parkranger nan di Parke Arikok a cuminsa traha nan a bin topa “sorpresa”.
Altura di of na e parti yama Boca Keto den careda di 7’or y 45 mainta nan ta bin topa cu dos boto y dos motor, mas cu claro bandona.
Esaki mesora a pone autoridad na altura, cu a poco poco a drenta cu basta polis pa cuminsa busca.
Un buskeda grandi a cuminsa, y por a mira cu agentenan di departamento di droga tawata na Shete. Esaki ta bira un posibel indicacion cu lo por ta tratando di droga y hopi mas cos, incluyendo traficacion ilegal di hende.
Un biaha mas, pa con fastioso cu e por zona, con por ta posibel cu no 1 pero 2 boto ta drenta Aruba den oranan di marduga y move tur den Parke Arikok y niun hende no a mira of tende nada?
Algun rato despues a pidi Helicopter di Marina, cu mester a bula di Corsou bin Aruba pa bula over di Parke y asina trata mira si tin hende scondi.
Locual a pasa aki ta sumamente peligroso, debi cu esnan cu a drenta tey rond awor aki y nos tur no sa ken nan ta, y sin papia mes di kiko tur nan a trece.
