WILLEMSTAD – Sr. drs. E. (Edson) Hato, MBA, a anuncia cu e ta sigui su carera otro caminda. Entrante prome di december 2024 e ta tuma despedida como Representante di Hulanda na Aruba, Corsou y Sint Maarten.
Sr. Hato: “Mi a cumpli cu e rol di Representante di Hulanda na Aruba, Corsou y Sint Maarten cu hopi pasion. Un periodo educativo y intensivo, durante cua mi a traha pa yega na un colaboracion fructifero entre e cuater paisnan den Reino. Aunke mi ta di acuerdo cu e meta final di e colaboracion aki – un bon relacion entre e paisnan, mi tin un punto di bista diferente riba con nos por logra e meta ey. Pa e motibo ey, despues di bon consulta mi a dicidi di entrega mi asignacion. Den e tempo benidero mi lo enfoca riba e siguiente pasonan den mi carera. Mi ta gradici tur hende pa e colaboracion den e periodo tras di lomba.”
Sr. Lapperre, director-general Relacionnan den Reino: “Na prome luga mi kier gradici señor Hato pa su esfuersonan. Cu alma y curason ela compromete su mes na Reino. Naturalmente mi ta respeta su desicion, ta gradici’e pa e colaboracion placentero y ta dese’e tur cos bon cu e siguiente paso den su carera.”
For di prome di september 2023 sr. Hato tabata Representante di Hulanda na Aruba, Corsou y Sint Maarten, staciona na Willemstad.