ORANJESTAD – Awe mainta te den oranan di atardi, den Corte di Husticia, e abogadonan di e sospechosonan caso Flamingo a hiba nan defensa.
ARUBA NATIVE por a compronde cu e mayoria di e abogadonan den nan defensa, a bolbe exigi pa Hues declara Ministerio Publico no admisibel den e caso penal pasobra Ministerio Publico a viola normanan.
DUNAMENTO DI TERENO A BAY CORECTO
Pa cu e caso Malmok, mr. Carlo a bisa Hues cu e asunto di e dama C. y e homber F., no tabatin ningun problema den e caso aki. E abogado a mustra cu e hefe di DIP Jaime Croes a bisa asina na Landsrecherche. Na opinion di mr. Carlo, ta door di expresion di Marisol Tromp cu a reemplaza Otmar cu a bira malo, a cuminsa un caso penal. Marisol lo a cuestiona cu cosnan no a bay bon. E abogado a bisa Hues cu e otorgamento di terenonan a bay di acuerdo cu e maneho nobo stipula na DIP. Asina e hefe di DIP a bisa y pesey no a haci keho. Ta ora cu Marisol Tromp a tuma over y presion di e Minister Presidente, e hefe a hay’e forza ta haci denuncia. Mr. Carlo ta haya cu mester declara Otmar liber di e acusacion aki.
NO A HACI ABUSO DI FUNCION
Mr. Carlo a sigui bisa cu no tabatin malversacion di Gobierno. No tabatin entrega di e terenonan y tampoco tin acta di Notario. Esey ta trece cun’e cu Min. Publ. no por acusa Otmar di malversacion di Gobierno y abuso di funcion. E abogado a mustra cu segun ley, ta e minister ta encarga cu dunamento di tereno, ora cu cumpli cu e condicionnan stipula. E abogado a bisa cu ni e dama C. y e homber F. a firma acuerdo pa haya tereno, pues no por papia di malversacion y tampoco cu Otmar a haci mal uso di funcion.
E abogado a splica con Otmar, ora a bira minister, a haci cambionan drastico na DIP pa asina garantiza maneho drechi den dunamento di tereno. No solamente pa comunidad sino tambe pa e personal na DIP. Door di esaki, no ta pone presion riba minister pa tuma decision sino den reunion di DIP hunto cu minister, ta evalua y dicidi riba peticionnan. El a mustra cu na DIP a bin cu e maneho pa duna prioridad na hobennan professional cu tin e potencial financiero, pa haya tereno. Ademas tabata atende peticionnan pa tereno atrasa. Mr. Carlo a bisa cu e proceso di tereno pa e homber G., e dama C y e homber F. a bay segun e maneho nobo di DIP. El a bisa cu Otmar a duna 200 tereno. Door di un fayo na DIP a bin e dobble reservacion di tereno na Malmok entre e homber G. y e dama C. Otmar a para riba cu mester drecha e fayo aki. Door di esey Otmar a ordena Wever pa drecha esaki.
E abogado a remarca cu pa 47 tereno cu a wordo otorga a base e maneho nobo di DIP, Min. Publ. no a bisa nada y pa e caso ariba menciona ta cuminsa cu caso penal.
TUR TRES AMBTENAAR TABATA TRAHA
Mr. Illes a cuestiona e acusacion di ambtenaar fantasma. E abogado a bisa cu e ta haya cu e acusacion ta crea bruhamento. El a puntra si Otmar tabatin e intension di tuma e ambtenaarnan intencional pa nan no traha y asina malversa Gobierno. E abogado ta haya cu Min. Publ. no a prueba cu tin ambtenaar fantasma y pesey mester declara Min. Publ. no admisibel. Na opinion di abogado, ta normal cu un minister ta nombra su hendenan cu e ta confia. Esaki ta un practica den henter Antiyas y tambe na Hulanda. Phillips, Tiel y Geerman a wordo selecta pa Otmar pa traha p’e. El a mustra cu pa nombramento di hendenan di minister, mester tin decision di conseho di minister y mester tin presupuesto pa esaki. E abogado a sigui bisa cu nan no ta cay bou di e ley di un ambtenaar y no ta bin na remarke di pension y otro beneficionan. Nan ta solamente den servicio di e minister te ora cu e Gabinete baha. E abogado ta haya cu no tin nada contra ley den e caso aki. E abogado a bisa cu e hecho cu conseho di minister a aproba esaki, ta mustra transparencia y cu a sigui e caminda legal. Mr. Illes a remarca cu ta solamente Marisol Tromp ta bisa cu e hendenan aki no a traha. No tin ningun indicacion cu nan no a traha pa Otmar. E ta haya cu Min. Publ. a faya di sigui haci investigacion riba e acusacion di Marisol Tromp. No ta asina cu Otmar y e ambtenaarnan a malversa Gobierno pasobra nan no a traha.
E abogado a mustra cu riba e website nospublico.aw ta mustra tur acuerdonan cu ministernan ta sera cu nan hendenan. Esaki ta un procedura normal den Gobierno. No ta asina cu Otmar tabatin intension cu Tiel ta bay traha cu Jeandrick cu a habri un negoshi. Pesey e abogado ta haya cu mester declara e acusacion no admisibel.
Pa loke ta Geerman, e abogado a mustra cu Geerman a bisa cu el a wordo acerca pa Otmar den presencia di Minister Presidente Wever Croes. Esaki ta relaciona cu e proyecto pa personanan handicapped. Geerman tambe a bisa cu Otmar a pidi’e pa ta encarga cu e publicacion di Otmar den radio. Den Corte, mr. Illes a hasta laga pasa un declaracion di Minister Presidente Wever Croes cu a bisa cu despues cu a kita Marisol Tromp, el a tuma over algun di e ministerio ey entre otro Geerman y cu Geerman a traha debidamente. Abogado mr. Illes ta haya cu Min. Publ. ta pinta Geerman di ambtenaar fantasma siendo cu Minister Presidente mes ta bisa cu Geerman a bay traha cun’e. E abogado ta haya cu e acusacionnan di malversacion no tin base y pesey mester declara Otmar liber di e acusacion aki.
OTMAR NO A WORDO CUMPRA
E abogado ta haya cu Min. Publ. kier sugeri cu e trabou di Geerman ta un forma di cumpra Otmar y mesun cos Tiel. Na opinion di e abogado, no por prueba cu Otmar a haya algo. Segun Min. Publ. e promocion di partido di Otmar door di Geerman y e trahamento di Tiel serca yiu di Otmar, Jeandrick ta e cumpramento. Esaki no ta e berdad. Otmar a spica kico ta e trabaonan di Geerman y e pasa cos di Otmar na radio pa asina publica su maneho. No ta asina manera Min. Publ. cu ta propaganda politico. No tin ningun prueba cu Geerman a haci propaganda politico via radio pa Otmar. E abogado a pidi Hues pa declara Otmar liber.
NO A YUDA HENDE PA HAYA VOTO
Mr. Carlo a bisa cu e hecho cu Esser a yuda Otmar cu yuda hendenan cu bin na oficina pa haya ayudo, no tabata pa haya voto. El a mustra cu Esser tabata yuda traha cartanan, solicitud pa trabao. Otmar tabata haci follow up cu hendenan cu a haci solicitud. E tabata haci esaki via whatsapp. No ta asina cu tur e ayudonan cu Otmar tabata haci, ta castigabel. E abogado a bisa cu na Aruba e costumber ta cu un politico ta yuda hende. E ta haya cu Min. Publ. ta bay solamente tras di e lista cu a haya di Esser pa cualifica cu Otmar tabata favorece hendenan pa haya voto. E abogado ta haya cu Min. Publ. no a haci mas investigacion pa determina kico realmente Otmar tabata haci. El a bisa cu Esser tabatin su listanan di hendenan cu e tabata yuda y no tin nada di haci cu Otmar. Tur peticionnan ta wordo manda pa haya contesta. E abogado ta haya cu mester declara Otmar liber di e acusacion di a wordo cumpra. No ta asina cu Otmar lo a influencia na DIP, Serlimar y DOW pa su hendenan haya trabao. E abogado a menciona cantidad di hende cu a haya trabao of promocion corectamente.
CASTIGO ABSURDO
Segun mr. Carlo, ta algo normal na Aruba cu hendenan ta busca contacto cu minister. Esey no ta algo castigabel. Otmar tabata hiba un maneho via su ministerio. E abogado ta haya cu mester declara Min. Publ. no admisibel door di a viola normanan. Mr. Carlo a pidi Hues pa tene cuenta cu a violacion di normanan cu a afecta Otmar Oduber hopi. E abogado a bisa cu Otmar no tabatin beneficio financiero. E ta haya e castigo exigi pa Min. Publ, absurdo. E abogado a bisa Hues cu si haya cu Otmar ta culpabel, dun’e castigo igual na loke e tabata sera caba, cual ta un castigo gusto.