ORANJESTAD, Aruba: 25 November 2024 – Aruba Hotel & Tourism Association (AHATA) a celebra e logro di 112 supervisor y hefe di departamento cu a completa e curso ofreci den colaboracion cu CHTA Education Foundation (CHTAEF). E tayer titula “Own Your Supervisory Authority Responsibly” a tuma forma di un bootcamp di 2 dia.
E participantenan a consisti di gruponan di varios hotel, restaurant, timeshare, compania medico, benta, vacation rentals y compania di seguridad. E bootcamp facilita pa CHTAEF, a wordo diseña pa empodera personanan cu rolnan di supervicion pa eherce nan trabou como lider di manera responsabel.
E ceremonia a habri cu palabranan di Sra. Vanessa Rasmussen, Manager di Member Services and Administration di AHATA, ken a expresa orguyo den e cantidad grandi di participante y nan compromiso pa excelencia den e sector di turismo. Sr. Mike Hampton, Trustee di CHTAEF, tambe a comparti palabra di motivacion y a entrega e participantenan cu nan certificacion hunto cu Sra. Rasmussen.
E exito di e bootcamp ta representa un otro logro importante pa AHATA, reflehando nan meta y enfuerzo pa promove un turismo prospero y responsabel pa tur. E asociacion ta comprometi pa sigui inverti den e desaroyo di su miembronan, y di nos forsa laboral den e sector di hospitalidad.
AHATA ta felicita tur participante cu nan certificado y e gran balor di nan trabou pa nos isla. E asociacion tambe ta yama danki na La Cabana Beach Resort y Eagle Aruba Resort cu a yuda patrocina e bootcamp.
