Balashi – Diasabra anochi rond di 10’or, algun persona contemplando e decoracion di Pasco dilanti WEB a mira un pickup perde control poco mas pabou.
Un chauffeur na stuur di un Isuzu pickup color blanco biniendo di pariba a yega e t-kruising dilanti WEB; pero a subi e isla memey. E ta ranca un borchi di trafico, y sigui drenta un pida mondi y a bay dal contra un tubo di awa di WEB.
Esaki a causa un scheur basta grandi; unda cu e awa a cuminsa spuit cu presion. E chauffeur mes a sali bon di e auto, pues e no a resulta herida.
Polisnan di trafico eybanda mes a yega mesora, y a cuminsa atende cu e chauffeur cu a wordo deteni algun minuut despues pa core auto burachi.
Transportwagen a yega y a hiba e chauffeur warda di Shaba, unda e lo mester a keda presenta dilanti un Subfiscal.
Personal di WEB tawata cerca y a yega y pone nan mes na altura di e sucedido.