Durante ACI LAC Conference na Guadalajara, Mexico
Oranjestad- Aruba Airport Authority N.V. (AAA) tin e placer di anuncia cu Aeropuerto Internacional Reina Beatrix (Aeropuerto di Aruba) cu masha orguyo a ricibi nan prome ACI-LAC Green Airport Recognition na honor di su liderazgo y esfuersonan di sostenibilidad intachabel riba dialuna 11 di november 2024. Angeline Flemming, Director di Health and Sustainability, a acepta e premio aki den nomber AAA y di henter e comunidad di aeropuerto.
E programa ACI-LAC Green Airport Recognition di Airport Council International (ACI) tin como meta pa promove e miho practicanan ambiental pa minimalisa e impacto cu aviacion tin riba medio y pa reconoce e miembronan di aeropuerto cu a alcansa logronan sobresaliente den nan proyectonan ambiental. E aña aki, ACI-LAC Airport Members, por a entrega nan proyectonan sobresaliente bou di e categoria Economia Circular cu ta encera e uzo eficiente di recursonan door di optimalisa e consumo di awa y coriente, extension di e ciclo di bida door di prolonga e uzo di e productonan y materialnan, y minimalisacion di desperdicio door di reduci e cantidad di desperdicio cu ta bay p’e destino final.
Como parti di e compromiso di Aeropuerto di Aruba cu sostenibilidad y reduccion di su impacto ambiental, a incorpora sostenibilidad den cada aspecto di e operacionnan di aeruopuerto pa logra diferente iniciativa den tres categoria: aviacion sostenibel, operacion sostenibel y un comunidad sostenibel den aeropuerto. Un parti importante di e esfuersonan di AAA pa bira mas sostenibel ta e proyecto di expansion Gateway 2030 Fase 1A, cu ta representa un inversion significativo pa modernisacion y innovacion di aeropuerto pa supera e limitacion di capacidad y brinda un experiencia di nivel mundial mientras ta construi un edificio saludabel, eficiente y cu ta spaar gasto.
Ademas, Aeropuerto di Aruba a aumenta su esfuersonan den e recopilacion, monitor y maneho di dato di rendimento di sostenibilidad pa sigui desaroya e plannan di maneho di medio ambiente incluyendo maneho sostenibel di desperdicio y pronto lo introduci medidanan nobo pa mehora e esfuersonan di maneho, deshaci di desperdicio y reciclaje. Cu diferente Airport Sustainability Certifications como base pa e proyectonan y e iniciativanan actual y pa futuro, Aeropuerto di Aruba ta lidera como un ehempel door di adopta miho practicanan sostenibel y ambiental y continuamente ta sigui inspira e organisacionnan na nivel nacional y regional pa sigui haci mescos.
Tocante AUA Airport Tocante AUA Airport AUA Airport ta un di e aeropuertonan mas ocupa den region Caribe, cu mas di 25 diferente aerolinea operando na Aruba contribuyendo na casi 3 miyon pasahero pa aña y brindando
servicio aereo na 31 pais y 45 destinacion non-stop rond mundo. Di e mercadonan cu AUA Airport ta brinda servicio na dje, 76% ta di Merca y Canada, 16% ta di Latino America, 5% ta di Europa y 4% ta di Caribe Hulandes. AUA Airport ta reconoce cu esaki ta danki na un economia stabiel, clima politico, hospitalidad, populacion diversifica y siguridad general di nos isla. AUA Airport su aspiracion ta pa converti den un di e aeropuertonan mas sostenibel, sigur y prepara pa futuro den e region di Latino America y Caribe, brindando un espacio laboral confiabel, cu e instalacionnan moderno y ademas cu un excelente servicio n’e cliente p’asina por refleha e hospitalidad di Aruba, contribuyendo na un futuro prospero pa Aruba.
Haya sa mas di loke ta pasando na AUA Airport door di bishita www.airportaruba.com y conecta cu AUA Airport riba Twitter.com/Aruba_Airport, Facebook.com/ArubaAirport, Instagram.com/arubaairport, TikTok.com/@arubaairport y Linkedin.com/ArubaAirport.
