114
ORANJESTAD – E ekipo di Aruba Center League U8 a keda na di tres lugar den e torneo Bambinos 2024. Diaranson 6 di November 2024 nan a bolbe Aruba contento cu nan respectivo medayanan obteni.
E TORNEO
Tabata diaranson, 30 di october, cu e seleccion a biaha pa Santo Domingo pa representa Aruba den e torneo Bambinos 2024.
E weganan a bay hopi bon pa Aruba.
Dia prome di november e ekipo di Center League Aruba a encontra e ekipo Thunders di Puerto Rico y nan a gana 19 pa 8.
Dia 2 di november nan a encontra e ekipo Javilla Rojo di Republica Dominicana y Aruba a gana cu un score aplastador di 42-11.
Dia 3 di november Aruba a encontra e ekipo Javilla Azul di Republica Dominicana; segun nan propio manager ‘un seleccion traha den pura pa hunga contra Aruba’, y eynan ta e caminda cu nos muchanan a perde 8 pa 12.
A pesar cu Aruba a keda na di 2 luga den standings, pero door cu a perde contra Azul, Aruba a hunga dia 4 di november pa di 3 of di 4 luga, un biaha mas contra e ekipo Javilla Rojo caminda Aruba a gana 32-4, pues a keda na di 3 luga y e muchanan y e coachnan ta satisfecho.
E ekipo ganado ta Bolo Piroco di Puerto Rico cu no a perde ningun wega; un ekipo cu Aruba lastimamente no a topa den playoff.
Pa e muchanan di Center League e tawata un honor di por a representa nan isla y nan bandera den e torneo, y sigur, pa Aruba en general, e ta algo historico, mirando cu ta e prome biaha cu e liganan U6 y U8 por a representa Aruba den un torneo di Little League internacional den exterior. Por bisa cu e ta un experiencia grandi pa e muchanan y cu sigur lo yuda nan den nan desaroyo di baseball. Aruba U8 a bataya cu curason y a bolbe na di 3 luga den e campeonato di un total di 6 ekipo: 1 di Aruba, 1 di Panama, 2 di Puerto Rico y 2 di Republica Dominicana.
Nos ta masha orguyoso di Austín de la Cruz, Brady Nedd, Daedrian Koolman, Eduard Flanegin, Ian de Windt, Joshua Thiel, J’Sean Toppenberg, Liam Ruiz, Matthew Kock, Nathan Maduro, Rajiv Hernandis, Rushen Faria, Terrence Williams, Zeylan Werleman, y Zhaèr Thompson, y tambe di e manager di e ekipo Christopher Nedd y e pitching coach Edgar Flanegin, kendenan hunto cu coachnan de la Cruz y Koolman, a lucha pa hiba nos muchanan te final. Pabien na e muchanan y e coachnan!