ORANJESTAD – Awe Corte di Husticia a trata e caso penal cu Ministerio Publico a cuminsa contra e homber Dominicano L.A.S.A. (30). El a wordo haya culpabel di intento di mata.
ARUBA NATIVE por a compronde cu L.A.S.A. tabata desmenti di a hinca e homber C.M.A. pero Fiscal y Hues ta hay’e culpabel.
HINCAMENTO DEN RANCHO
Hues a puntra L.A.S.A. di e hincamento y el a desmenti di a hinca C.M.A. Ta asina cu C.M.A. ta actualmente cera pa un caso y a wordo treci Corte pa e caso. Hues a bisa cu segun e rapport di Polis, 3’or madruga 23 Maart 2024, Polis a bay Rancho pa un caso di hincamento. Polis a topa cu un homber bisti cu t-shirt blanco na sanger. E homber ta C.M.A., kende a hisa su t-shirt y mustra cu e tin hinca na pecho robez. Polis a scucha un dama T., cu tabata ey banda para, bisa cu mas leu e hincamento a tuma lugar y cu e cuchiu ainda ta eynan. E agentenan a bay y mira un plas di sanger y a haya e man di cuchiu y e blade mas leu. A pidi ambulance pa hiba C.M.A. hospital, caminda el a keda interna pa tratamento.
Segun relato di Polis, den group chat di Polis, un agente a manda potret di L.A.S.A. cu parce cu t’e a hinca. C.M.A. a declara na Polis, cu e homber cu a hink’e ta un Dominicano cu ta cana rond banda di Budweiser Bar. Polis ta bisa cu riba e anochi di 19 pa 20 Maart 2024, Polis a topa cu L.A.S.A. den Havenstraat ta cana. Polis a puntr’e kico e ta haci eynan. El a bisa cu e ta wardando un lift pa e bay Noord. Dia 24 Maart 2024 den oranan di marduga Polis a topa cu dos choller. Nan a puntra Polis si a detene e gay caba cu a hinca C.M.A. Nan a bisa cu ta e Dominicano L.A.S.A. (Luis), a hinca C.M.A. Polis a remarca cu despues di e hincamento, no a mira L.A.S.A. mas na Playa. Ta asina cu C.M.A. a wordo interna den hospital. E tabatin no solamente un hinca sino mordi tambe na pecho. C.M.A. a haci denuncia contra Luis. El a duna descripcion y bisa cu Luis ta cana den Rancho. El a bisa cu 23 Maart 2024 marduga, e tabata cana den Rancho y a topa Luis y e dama M. Ta asina cu tanto C.M.A., Luis y e dama M. ta choller. Segun C.M.A., Luis a cuminsa haci fastioso cu e dama M. y C.M.A. a bis’e laga M. para. Luis a pidi C.M.A. pa placa y C.M.A. a dun’e 5 florin. Luis a cana bay y C.M.A. a dicidi cana bay pa un snack. C.M.A. tabata cana y Luis tabata cana su dilanti. Luis a reclama C.M.A., pakico e ta cana su tras. C.M.A. a bis’e cu e no tabata cana su tras. A surgi un luchamento y C.M.A. a sinta Luis kita su armband. C.M.A. a pidi’e su armband. A surgi un otro luchamento y C.M.A. a sinti mordi y hinca door di Luis. C.M.A. a gara Luis den un yabi caminda Luis no por a haci nada. Ora Luis a pidi C.M.A. pa lag’e los, el a lag’e los. E ora ey hendenan a bisa C.M.A. cu e ta hinca. El a pidi pa yama ambulance. C.M.A. a reconoce potret di Luis cu Polis a mustr’e. Door di e hinca, C.A.M. mester a haya atencion medico y a keda 3 dia interna den hospital. A hinca a bora su pulmon y causa sangramento paden y mester a pone drenahe pa saca sanger for di e pulmon. Segun Polis, tin hende a mira con Luis a hinca C.M.A. cu cuchiu. Polis a mira video di seguridad caminda por mira Luis y C.M.A. ta cana y na dado momento nan para mey mey caminda y papia cu otro. Despues nan a cana bay y no por mira con e hincamento a sosode. Despues di un rato C.A.M. a cana bin bek y su flanel tabata na sanger. Investigacion forence ta mustra cu e cuchiu cu a haya, ta esun cu a usa pa hinca C.M.A. Ta asina cu Polis a detene Luis dia 29 Maart 2024 y na Polis Luis ta desmenti di a hinca. Segun Luis e dia ey e tabata na cas. El a bisa cu e no conoce C.A.M. El a hasta bisa cu e tin varios luna no ta anda den Rancho. Hues a remarca cu Polis mes a mira Luis ta cana den Rancho.
MAMA A DENUNCIA SU YIU
E mama di Luis na dado momento a bay Polis y splica cu e tin hopi problema cu Luis. El a splica Polis cu el a cuminsa proceso pa pone Luis bou curatela na 2020 y cu na 2019 Luis mester a wordo interna den centro di Motivacion pa rehabilita. E mama a bisa Polis cu desde cu Luis a sali, el a bira peor. E mama a bisa cu tur dia Luis ta usa piedra, siendo cu Luis a bisa Polis cu ta marihuana e ta usa. E mama a bisa Polis cu tur ora Luis ta cana cu cuchiu. Segun e mama, e no tin paz mas y cu Luis hopi biaha ta huma piedra den cas. E mama a bisa cu 18 Maart 2024, Luis a bay for cas y no a bay bek. El a bay den Rancho y di 23 Maart 2024 mas o menos 5’or di marduga, el a bolbe cas. Segun e mama, desde e dia ey, e amiga di Luis a manda whatsapp pa e mama pa bis’e pa bisa Luis bay entrega su mes pasobra famia di C.M.A. ta busk’e pa mata. E mama a confronta Luis cu e voice mail y Luis a admiti di a hinca C.M.A. E mama a bisa cu e no kier Luis mas den cas y kier pa Luis haya ayudo pa su adiccion.
EXIGI 4 AÑA DI PRISON
Fiscal a bisa cu hecho ta cu 23 Maart 2024, C.M.A. a wordo hinca den pecho banda robez. Su pulmon a klap y a haya e cuchiu cu cual a hinca C.M.A. For di e victima a tende cu ta Luis a hink’e na pecho banda robez. El a reconoce Luis riba potret. Fiscala mustra cu Luis su mama a declara cu ta su yiu a hinca C.M.A. Tin declaracion di un testigo tambe cu a bisa di a mira Luis hinca C.M.A. Fiscal a bisa cu ora hinca un hende den pecho cu cuchiu, automaticamente e riesgo ta grandi cu e persona por muri. Fiscal ta haya legalmente proba cu ta Luis a hinca. Fiscal ta considera esaki un intento di mata. Pa cu e castigo, Fiscal a tene cuenta cu Luis ta un adicto y for di 2020 e ta bao curatela. Fiscal ta lamenta cu Luis no kier coopera cu Reclasering y como tal no por haci nada pa yuda. Fiscal a exigi 4 aña di prison, di cual 1 aña ta condicional y 2 aña di prueba.
ABOGADO
Abogado mr. Edwards a bisa Hues cu den e caso aki, caya ta papia. Ta un caso serio. Na Polis Luis a bisa cu el a tende cu el a hinca C.M.A. Segun abogado, C.M.A. lo tabata sigui Luis y na dado momento a surgi luchamento y Luis a hinca C.M.A. E abogado a bisa cu Luis a desmenti di a hinca. Na opinion di abogado, Polis a haya un cuchiu kibra. E cuchiu ta limpi, pero no a haci investigacion debido. No a busca fingerprint y tampoco a check si e sanger ta di C.M.A. E abogado a bisa Hues cu e no ta haya cu tin suficiente prueba. E abogado a bisa cu e mama a bay Polis tur preocupa pasobra caya ta papia cu nan ta busca su yiu Luis pa mata. E mama a duna declaracion na Polis y e pregunta ta si esaki ta suficiente prueba. Na opinion di mr. Edwards, tur e caso a bira un cos di redashi pero ni e mama ni e amiga di Luis a mira e hincamento sosode. El a bisa cu Luis ta para riba cu e no a hinca. E abogado ta haya cu si tin indicacion fuerte, Polis mester a haci mas investigacion. E ta haya cu e prueba ta un poco dudoso. E abogado a mustra cu Reclasering a conseha pa haci investigacion psycologico riba Luis. E abogado a puntra si mirando esaki, lo por yega na un castigo husto pa Luis. E abogado a puntra cu den e 1 aña condicional, kico lo sosode cu Luis den e periodo aki. E abogado a bisa cu Luis kier rehabilita.
SENTENCIA
Hues a sera tratamento di e caso y a dicta sentencia di biaha. Hues a bisa cu e ta haya proba intento mata. Hues a mustra cu tin declaracion di e victima C.M.A. Tin un testigo a bisa cu el a mira Luis a hinca. Mama di Luis mes a bisa Polis cu Luis a hinca. Tambe Hues ta haya cu Luis no a bisa e berdad. Hues a rechaza ponencia di abogado cu ta redashi. Hues ta haya cu tin prueba. El a bisa cu danki Dios cu C.M.A. no a muri aunke cu su pulmon a klap sera. Pa cu e castigo, Hues a bisa cu e ta tene cuenta cu sentencianan di Corte. Hues ta haya cu e castigo mester ta mas pisa. E ta comparti Fiscal su opinion cu Luis ta desmenti. Hues a confirma exigencia di Fiscal. Hues a condena Luis na 4 aña di prison di cual 1 aña ta condicional cu 2 aña di prueba.