Dutch Caribbean Nature Alliance (DCNA) ta contento pa anuncia e resultadonan di Big Live Nature Quiz – Kids Edition di 2024, un evento exitoso caminda e scolnan basico y amantenan di naturalesa hoben di Aruba, Boneiro, Corsou, Saba, St. Eustatius y St. Maarten a bini hunto pa amplia nan conocemento di naturalesa pa medio di siñamento y competencia.
Mas di 480 studiante di tur e seis islanan di Caribe Hulandes a participa den e quiz online bibo. Diseña pa inspira y educa, e quiz a enfoca riba e tema “E Habitantenan local, e Nobonan y Invasivonan di Naturalesa”, pa siña e muchanan tocante e ecosisteman unico di Caribe Hulandes y e importancia di proteha nan medio ambiente contra especie invasivo.
Y e Ganado ta…
E ekipo ganado di e quiz di e aña aki ta”Dutch learners” or di Saba Sacred Heart
na Saba! Cu nan conocemento impresionante di especie nativo, no nativo y invasivo, nan a derota nan contrincantenan pa tuma e prome luga den e “Big Live Nature Quiz” di 2024. Como premio pa nan prestacion excepional, e ekipo lo disfruta di un emocionante biahe riba barco di bela y di snorkel cu nan docente, na unda nan ta haya e oportunidad pa explora bida marino rond di nan isla y pa profundisa nan conexion cu naturalesa.
Tambe cada isla a celebra su campeonnan local, na unda nan a reconoce nan dedicacion na educacion di naturalesa. E ganadonan local ta:
- Aruba: Anne Droid di Colegio San Hose
- Boneiro: Yfke Kiara Ezrah Keke di Basisschool Aquamarin
- Corsou: de spiekende spinnen di Albert Schweitzerschool
- Saba: Dutch learners di Saba Sacred Heart
- St. Eustatius: Flamboyant Sint Eustatius di Governor de Graaff Foundation
- St. Maarten: Adventure Kids di St. Dominic Primary School
E ekiponan aki, cu a demostra nan excelente conocemento y nan trabou den ekipo, ta ricibi un kit di snorkel pa sigui stimula nan amor pa ocean y su ecosisteman.
DCNA ta extende un felicitacion sincero na tur ekipo participante pa nan entusiasmo, nan esfuerso y nan impresionante conocemento di naturalesa! Nos ta ansioso pa mira e campionnan di medio ambiente aki sigui crece y proteha e biodiversidad rico di Caribe Hulandes.
Un Experiencia Interesante y Educativo pa Tur Hende
E quiz a ofrece e muchanan un oportunidad fantastico pa ta ocupa cu naturalesa den un forma ameno y interactivo. Cu pregunta basa riba DCNA’s BioNews Kids magazine e participantenan a siña tocante e diversidad di fauna di nan islanan y e desafionan di e especienan invasivo. E revista, obtenibel den diferente idioma, entre otro Ingles, Hulandes, Papiamentu y Papiamento, a yuda e muchanan prepara pa e evento y lo sigui sirbi como un recurso educativo valioso.
Un Esfuerso Colaborativo pa Educacion di Conservacion
Big Live Nature Quiz ta un esfuerso di ekipo, cu a lanta door di colaboracion di tur seis isla di Caribe Hulandes y e partnernan di DCNA: Aruba Conservation Foundation, CARMABI, STINAPA, Saba Conservation Foundation, St. Eustatius National Parks Foundation (STENAPA), y Nature Foundation Sint Maarten. Cu sosten di scolnan local, Dutch Caribbean TV y contribuicion financiero di Ministerio di Agricultura, Pesca, Siguridad Alimentario y Naturalesa, y Loteria Nacional Hulandes di Codigo Postal e evento a yega cerca e hobennan den henter e region.