Helikòpter di Wardakosta ta evakuá persona for di riba barku krusero

Willemstad
Ayera mainta Wardakosta a risibí un notifikashon pa un evakuashon médiko riba un barku
krusero. Tabata trata di un hende hòmber di 66 aña di edat ku a haña un atake di kurason.
E persona ku a mèldu Wardakosta, a informá ku tin nesesidat di un helikòpter pa
transportá e persona urgente pa un hospital pa e risibí kuido médiko. E Sentro
Operashonal Marítimo di Wardakosta despues di e notifikashon, a tumá kontakto ku e
médiko di CITRO, ku a drenta den kontakto ku médikonan abordo di e barku krusero.
Abase di e konsulta ku e médiko di CITRO a manda e helikòpter na e krusero ku tabata na
ost di Boneiru, pa rekohé e hende hòmber i hib’é aeropuerto Hato kaminda un ambulans
tabata pará kla pa transport’é pa hospital. Wardakosta ta deseá e persona un pronto
rekuperashon.