28
Oranjestad – 4 di november 2024 – Durante fin di siman, e seminario hopi anticipa “Co-Parenting in Harmony”, organisa pa Piso Tres, a tuma lugar cu hopi exito na Occasions Ballroom.
E seminario, en conexion cu Dia Internacional di Mucha, a duna hopi conocemento y recursonan pa tur participante riba e topico esensial di “co-parenting”.
E evento patrocina pa Aruba Bank, a demonstra e compromiso di sostene famianan y promove un ambiente saludabel pa e futuro generacionnan.
E focus principal di e seminario tabata pa duna tur participante strategianan practico tocante “Co-Parenting”, incluyendo tecnicanan di comunicacion, con pa resolve conflictonan, aspectonan legal, y planiamento consistente entre mayornan. E dia a conta cu oradornan den diferente rango di experticio, manera un terapeuta di famia, un abogado di leynan di famia, y un coach pa mayornan, cu a lidera
sesionnan interesante y tambe a conta cu un panel di “Real Talk”, dunando tipsnan practico riba con pa nabega e desafionan di “Co-Parenting”.
Cu un audiencia di 200 persona presente, e evento no solamente a duna balor educativo, pero tambe a duna un oportunidad pa mayornan conecta, comparti experiencianan, y crea un red di apoyo. E ehercicionan practico y discucionnan interactivo a ricibi entusiasmo y aprecio di e participantenan.
Aruba Bank ta orguyoso di por a forma parti di un iniciativa tan impactante, pasobra sostene famianan y contribui na e bienestar di nos muchanan ta un parti esencial di locual e banco ta kere den.
