ORANJESTAD, Aruba 29 di october 2024: Parlamentario di Fraccion di MEP, Ricky Hoek, tabata den un entrevista cu
Jhon Watts na e programa radial La Kalle, caminda el a elabora riba su trabaonan politico y su rol den Parlamento.
Hoek a laga sa cu e ta sinti hopi optimista y cu hopi gana di sigui traha pa Aruba. Como politico ta necesario sinti bon pa asina conecta cu e pueblo, el a expresa.
Roderick ‘Ricky’ Hoek ta parlamentario for di 2021. El a realisa trabaonan comunitario, a eherce e funcion di director di Asociacion Trabao pa Hubentud (ATHA), y a traha 4 aña como profesor na Universidad di Aruba den e estudio di Trabao Social y Desaroyo.
Pa loke ta e parti personal, el a conta cu e ta casa, e tin un yiu, y e ta un boluntario yudando un club di futbol di su bario. Un ciudadano hopi activo.
Como parlamentario, su trabao ta pa scucha y compronde loke pueblo kier y mester. Un herment cu tin den Parlamento ta e mocionnan, cual ta hopi importante pa e Parlamento evalua y studia, pa asina Gobierno por haya conseho pa ehecuta.
Un di e mocionnan mas importante durante su carera parlamentario tabata na 2022, caminda el a entrega un mocion pa e implementario di parkeerplaats pa e personanan cu limitacion, como pa e adultonan mayor. Den su calidad di parlamentario, el a entrega un mocion cu a wordo acepta unanimamente den Parlamento. Loke Gobierno tin cu haci awor ta conduci un inventarisacion di e parkeerplaats pa asina sa cuanto tin, unda nan ta ubica, y duna nan un number. Cu esaki, Polis lo por bay actua y duna boet ora un chauffeur sin permiso staciona riba e vak special ey.
Otro mocion importante tabata enfoca den e hobennan. “Mi enfoke den Parlamento ta e hobennan, nan desaroyo. Tambe riba e personanan cu discapacidad, e area social, educacion y labor,” e parlamentario a indica. Hoek a agrega cu el a boga pa e minister por a introduci un instituto special pa e hobennan cu a haya problema cu husticia. Despues di a haci algun estudio, a conclui cu esaki ta un bunita proyecto, pero cu ta costoso y na e momentonan aki Aruba no tin e fondonan pa ehecuta e proyecto aki, el a bisa. Pero loke si por haci ta traha c’un departamento pa hobennan na KIA (Korrectie Instituut Aruba). E departamento aki na KIA, minister di husticia y asuntonan social, como minister di educacion, a haci un ampliacion pa e hobennan cu ta eynan por finalisa nan scol. E deseo ta pa introduci algun curso a traves di Enseñansa pa Empleo. Di e forma aki, a bin ta enfoca pa e hobennan cu ta na KIA por haya e oportunidad di sigui desaroya y sigui padilanti, Ricky Hoek a indica. Su pensamento ta cu mester traha un plan di estimulo pa e hobennan pa nan por sigui cu nan studio.
Loke tambe el a introduci ta un mocion pa e sector laboral, pa mantene e hoben central, pa ora nan cab’i sinta nan castigo cu nan por sigui traha. “Ta importante pa nos como mayornan, maestronan y anos como gobernantenan pa crea oportunidadnan di desaroyo pa e hobennan aki na Aruba,” Ricky Hoek a expresa.