Na augustus 2023 a duna inicio na e proyecto ‘Biba Nos Herencia’ (Lang Leve(n) het Erfgoed).
Un proyecto cu ta un cooperacion entre Stichting Monumentenfonds Aruba (SMFA) y Fotografo Monique Anrochte di Hulanda y ta finacia pa Fonds voor Cultuurparticipatie.
Na inicio di e proyecto nos a organisa tres Instameet caminda cu cuater fotografo di Hulanda a bin Aruba como “photo-coaches”. Un Instameet ta un encuentro di usuarionan di Instagram cu ta topa hunto personalmente pa explora, redescubri y fotografia un area.
Hunto cu diferente amantenan di fotografia y cultura a participa a explora e herencia cultural di Rancho, Playa y San Nicolas.
Durante e prome Instameetnan cual tabata organisa pa partnernan cultural manera entre otro Museo Archeologico Nacional di Aruba, Fundacion Museo Arubano y Stichting Rancho a bishita diferente organisacion y museonan caminda e participantenan por a haya informacion tocate Aruba su herencia cultural material y inmaterial y captura esaki pa asina preserva esaki pa futuro generacionnan.
For di e prome Instameetnan cu a duna inicio na e proyecto a surgi un grupo di boluntarionan dedica cu a uni na e na e proyecto y ta organisa Mini- Instameets tur luna pa un grupo di mas o menos 20 participante. Hunto nan ta explora e casitanan, edificionan historico den diferente distritonan di Aruba pero tambe tradicionnan y e personannan tras di Aruba su herencia cultural.
No solamente ta trata di captura nos herencia cultural den un imagen pero tambe tin di e boluntarionan, “storytellers”, cu ta encarga pa busca e storianan tras di e monumentonan y nos herencia cultural.
Danki na e Instameetnan a crea un comunidad digital di mas di sesenta amante di fotografía y cultura cu ta participa activamente na e diferente encuentronan. Tur luna nos ta organisa un competencia di fotografia riba Instagram cu un tema special manera por ehempel detayenan di e monumento, un color of angulo fotografico manera por ehempel refleho. Asina nos ta reta e participantenan pa wak y registra e monumentonan di un manera diferente. E resultado nan ta comparti riba Instagram pa por yega na un publico mas grandi.
Te cu awor nos a conclui 13 reto cu 13 ganador y mas di dos mil fotografia riba Instagram como resultado. Tur e ganadornan di e prome y di dos lugar tin e oportunidad pa forma parti tambe di e exposicion final di e proyecto cu lo tuma lugar na 2025.
Esun ku kier participa por uni na e reto cu ta anuncia tur luna riba Instagram di e proyecto: @langlevenheterfgoed y @monumentsfundaruba.
Pa participa djis lesa e challenge y e tipnan. Corda cual ta e hashtag di e reto y simplemente sali cu bo telefon of camera y explora e area rond dibo, busca cas of edificionan historico saca nan potret y comparti esakinan riba bo Instagram cu e hashtag di e challenge di e luna y #langlevenheterfgoed
E proyecto tin un duracion di dos aña y lo conclui oficialmente na 2025 cu un exposicion y un publicacion crea pa e fotografia y historianan colecta pa e boluntarionan. Pero nos ta spera si cu e“WhatsApp community” cu e proyecto a crea por keda activo den cooperacion cu nos boluntarionan y asina organisa nan propio Instameets y aventuranan. Asina aki lo sigui engrandece e coleccion di fotografianan di Aruba su herencia cultural riba medionan social y nos ta tene nos herencia literalmente na bista.
