ORANJESTAD – Awe mainta Corte di Husticia a trata e caso penal cu Ministerio Publico a cuminsa contra e hoben A.S.H. (19), kende ta wordo acusa di intento di mata dilanti di Oude Molen y posecion di diferente arma di candela.
ARUBA NATIVE por a compronde cu Fiscal a haya A.S.H. culpabel di intento di mata y posecion di arma di candela y a exigi 4 aña y 6 luna di prison. Abogado mr. Griffith ta haya cu A.S.H. a acuta den defensa propio y como tal mester declar’e liber.
Den sala di Corte tabata presente famia di A.S.H. o sea su mama y su rumnnan. Fiscal a bisa cu e ta acusa A.S.H. cu riba 15 October 2023, el a tira riba algun persona. Tambe Fiscal ta acusa A.S.H. cu entre 1 Augustus 2023 y November 2023, e tabata den posecion di armanan di candela y municion.
ARMANAN DI CANDELA
Hues a mustra cu na e cas na Seru Patrishi, unda A.S.H. ta biba serca su mama, Polis a haya un revolver. Segun A.S.H. e arma supuestamente no ta tira. E arma tabata den un tas di A.S.H. E arma tabatin balanan aden. Polis a check e arma y e ta funciona. Polis a haci investigacion den cellular di A.S.H. caminda a mira diferente potret y video cu diferente armanan di candela cu A.S.H. tabatin den su man. Segun A.S.H., un conoci a mustr’e diferente armanan y el a saca potret y video di e armanan pa mustra su amigonan. Segun A.S.H. nunca el a mira arma asina. Pa loke ta e revolver cu a haya na e cas, A.S.H.a bisa cu ta na October 2023 el a haya e revolver for di e conoci y e conoci a mustr’e e otro armanan.
TIRAMENTO
Hues a mustra cu 15 October 2023 banda di 5’or di mainta banda di Oude Molen tabatin tiramento. Hues a puntra A.S.H. kico a pasa cu A.S.H. a tira riba un auto. Segun A.S.H., el a sali cu algun amigo y su ruman chikito. Nan a bay Gusto y na dado momento dos homber a pasa y un di nan a bisa: “tin bala pa boso”. A.S.H. a keda asombra y a puntra e amigonan si nan tin problema. E amigonan a bisa cu no. Despues nan a bay Oude Molen pafor. Na dado momento e mesun dos hombernan a sali for di Oude Molen y un di nan a bisa: “ora mi bolbe, bala lo cay”. E ora ey A.S.H. a cana bay na un auto y a mira e hombernan den un auto Nissan March y bay unda su amigonan y su ruman ta para. El a bisa cu el a tende un tiro y hendenan a cuminsa core. E ora ey el a saca su arma y lo un tiro riba e auto. El a bisa Hues cu el a kere cu nan lo a tira riba su ruman cu tabata hunto cu otronan. Segun A.S.H. el a pensa cu ta esnan den auto a tira y a los un tiro. E no a wak kende a tira sino a tende un tiro. E ora ey a saca arma y tira. Segun A.S.H. e no a dirigi arma riba auto pa herida hende sino pa spanta.
HAYA ARMA DEN PARKING LOT
El a splica Hues, el a haya e revolver riba un auto den parking lot banda di Gusto. Despues di a tira cu e arma na Oude Molen, el a tira e arma afor.
Hues a bisa cu segun security di Oude Molen, a tende un tiro y hendenan a core drenta den Oude Molen. El a sali y haya sa cu un gay a tira riba un auto Nissan March. Tin otro testigo cu a mira A.S.H. tira y warda e arma den un tas.
Fiscal a haci serie di pregunta. A pasa video di seguridad y a puntra A.S.H. na unda el a haya e arma y despues na Molen a mustra na unda e tabatin e arma poni banda di un auto. Despues cu esnan a bisa cu ora nan bolbe bala lo cay, A.S.H. a cana bay na e auto y a coy e arma hinca den su tas. El a bisa cu el a coy e arma pasobra e no sa kico tabata nan intension. Fiscal a mustra cu A.S.H. a declara na Polis cu el a tira riba e man di un hende for di e Nissan cu a tira. Segun A.S.H., el a tira ariba di e auto y no riba e auto.
Hues a mustra cu Reclasering ta bisa cu A.S.H. mester di guia.
FISCAL NO TA KERE SOSPECHOSO
Fiscal a bisa cu e no ta kere A.S.H., cu el a haya un arma banda di un auto den parkinglot di club nocturno Gusto. Segun Fiscal, den Corte, A.S.H. ta duna otro declaracion compara cu loke el a bisa na Recherche.
INTENTO DI MATA
Fiscal ta haya cu for di inicio A.S.H. tabata cu e arma. Tabatin 4 hende den e auto Nissan March y mirando e distancia cortico for di cual A.S.H. a tira riba e auto, e chens tabata tey cu un hende den e auto por a muri. Segun Fiscal, for di video por mira cu A.S.H. a dirigi e arma riba e auto y a tira. Fiscal ta haya cu A.S.H. tabatin intension di tira mata. El a bisa cu na momento cu ta tira riba un auto riba un distancia cortico cu hende sinta aden, ta tuma e risico cu un hende den e auto por sali herida y muri. Na opinion di Fiscal, tur e testigonan cu a scucha, ta papia di a scucha un tiro so. Ningun ta bisa cu a scucha mas cu un tiro. Ningun ta bisa cu ta for di e Nissan a tira. Ta solamente A.S.H. ta bisa cu ta for di e Nissan a tira.
PROBLEMA GRANDI DI ARMA
Pa loke ta posecion di arma di candela, Fiscal a bisa Hues cu ta alarmante e cantidad di casonan di arma di candela den hobennan y tiramento. Esaki ta crea inseguridad. Pesey Ministerio Publico ta baha pisa riba posecion di arma di candela. Pa cana cu arma riba caya ta 2 aña di prison. Pa intento di mata ta entre 5 y 6 aña di prison.
NO TIN DEFENSA PROPIO
Fiscal a bisa Hues cu e no ta kere cu aki por papia cu A.S.H. a actua den defensa propio. No tabatin circumstancia cu ta mustra cu esey lo a sosode.
CASTIGO
Pa cu e castigo, Fiscal a bisa cu e ta tene cuenta cu A.S.H.(19) ta hopi jong. Pero mirando seriedad di e caso, el a exigi 4 aña y 6 luna di prison.
ACUSADO NO A TIRA INTENCIONAL
Despues di a scucha e exigencia di Fiscal, mr. Griffith a bisa Hues cu e tempo ey A.S.H. apenas tabatin 18 aña y a bay sali cu su ruman cu a haci 17 aña. Nan a bay Gusto Night Club. Na dado momento un homber ta pasa dilanti nan y bisa “bala tin pa boso”. Na opinion di e abogado, esaki ta un amenaza directo contra nan. Envez di reacciona riba e menaza, nan a bay for di e lugar. Esey ta mustra cu A.S.H. no kier tabatin ningun confrontacion. Nan a bay na Oude Molen para pafor pa sigui celebra. Na dado momento e mesun homber ta sali y na forma amenasante ta pasa nan dilanti y a bisa: “ ora mi lora bek, mi lo bay tira”. E momento ey A.S.H. a cana bay y no a busca confrontacion contra e homber aki. E tabata busca manera di evita problema. E homber a lora bek, para su auto dilanti Molen, manera el a. A.S.H. a scucha un sonido duro y a mira tur hende core bay. El a kere cu lo a los un tiro y cu e menaza di e homber a bira realidad. Esey a haci cu A.S.H. a hay’e obliga pa tuma accion pa para e menaza e momento ey. El a haya un arma y a usa e arma y los 1 tiro pa stop e menaza.
ACTUA DEN DEFENSA PROPIO
Segun abogado, A.S.H. no tabatin ningun momento e intension pa herida hende cu arma di candela. E no ta haya cu A.S.H. a tuma riesgo pa herida of mata hende. A bogado ta haya cu mester declara A.S.H. liber pa e delito aki. El a bisa Hues cu ningun caminda por mira cu e tiro tabata dirigi pa causa herida. E tiro no a alcansa e auto.
E abogado a bisa cu aki mester papia di defensa propio. Tabata reina menaza serio di parti di e homber na dos occasion. Na Molen, e homber a cumpli cu loke el a bisa esta: “ora mi lora bek, bala lo cay”. Ora A.S.H. a scucha un sonido duro cu el a interpreta esaki como un tiro y a mira hendenan core, el a actua pa defende su ruman cu e momento ey tabata entre e hendenan. Na momento cu el a tira, e auto a core bay.
Pa loke ta posecion di arma, e abogado ta laga esaki na decision di Huez. El a pidi Huez pa aplica castigo hubenil, mirando cu A.S.H. tabatin 18 aña of duna castigo igual na loke A.S.H. a sinta caba.
Hues a sera tratamento di e caso y a bisa cu e ta bay evalua y dia 15 November 2024 lo tin sentencia.