ORANJESTAD – Diahuebs mainta, Prome Minister Evelyn Wever-Croes a reuni cu señora Miangela Ras presidente di e comicion di Centro di Desaroyo di Hende Muhe CEDEHM, y demas miembronan di e comicion.
Prome Minister a expresa cu mirando cu na Aruba violencia contra mucha muhe y hende muhe ta un problema hopi serio, el a institui un comicion bou di guia di CEDEHM pa hunto cu diferente stakeholders traha riba un plan con pa frena abuso contra mucha muhe y hende muhe. Tambe el a indica cu ya caba tin un maneho, “gender policy”, cu ta duna liñeanan general di con pa atende cu e abuso aki, y con pa fortifica proteccion y posicion di hende muhe. Basa riba esaki, Prome Minister a pidi e comicion pa traha riba un plan di implementacion.
Den e comicion di CEDEHM, a añadi un persona cu ta respresenta sector priva, 2 persona di e veld social, y un representante di Ministerio di Asuntonan General, di cual hunto cu CEDEHM a haci entrega di e plan di implementacion na Prome Minister.
Mester menciona cu hopi informacion relata na e seriedad di e problena aki a wordo suministra na e comicion pa asina nan por traha efectivamente riba e plan. A constata cu e edad di hende muhe cu ta wordo abusa fisicamente y sexualmente ta bahando, y cu e hobennan na Aruba falta hopi informacion. E recomendacion principal pa cu esaki ta pa traha riba consientisacion y acumulacion di data pa asina por sigui monitoria e seriedad di e problema aki.
“Mi ta gradici e comicion y specialmente CEDEHM y Keaneeh Krozendijk di Ministerio di Asuntonan General pa e trabou grandi cu nan a haci riba e plan di implementacion. Na November, cu ta e luna na unda ta para keto na violencia contra mucha muhe y hende muhe, lo tene un conferencia cu tur esnan envolvi pa asina di biaha cuminsa ehecuta e plan aki, cu e meta pa logra cu nos mucha muhe y hende muhenan ta mas sigur, tin mas proteccion, y cu nan tin mas oportunidad di desaroyo. Esaki tabata mi compromiso desde cu ma drenta den gobierno. Mi ta sumamente satisfecho cu awor tin un plan di implementacion pa asina sigura un miho futuro pa nos hende muhe y mucha muhenan” Prome Minister a expresa.