ELMAR a organisa un bes mas su Open Dag riba diadomingo 20 di oktober; un evento cu a uni miles di famia, cliente, studiante, y e comunidad general pa un dia yen di informacion, demonstracion, y diversion. Bou di e tema “Un Dia Electrico,” e evento a duna e bishitante un oportunidad unico pa experiencia di cerca e mundo fascinante di coriente. Un highlight di e evento tabata e demonstracionnan en bibo di electricidad di e Team di Underground cables (miho conoci como Kabelafdeling) y Grid Quality Management.
Pa famianan, e atraccion di weganan electrico crea pa ELMAR mes tabata un gran hit. E muchanan a disfruta mientras cu a interactua cu e caracter di ELMAN, ELECTROMAR, y otro weganan cu a presenta e concepto di energia den un manera fun y educativo. Pa celebra e 200 aña di e nomber Oranjestad presenta pa artista Steve Francees, ELMAR a tene tambe un exposicion cu ta mustra e historia y impacto di ELMAR su presencia den e capital di Aruba.
E Departamento di DTI, instaladonan reconoci pa DTI, y e Team di Inspeccion di ELMAR tabata presente pa duna informacion tocante seguridad y inspeccion di coriente, y tabata tin un gran interes den energia solar y instalacion di panel solar. Mientras cu e booth di vehiculo electrico (EV) – presenta pa Garage Centraal, All To Car, y Activated Power – a permiti cu bishitantenan por explora y test e EV-nan. E Team di ELMAR EV ChargeUp a duna informacion tocante ELMAR su netwerk di stations di chargers di EV rond di nos isla.
E Meter & Connection Team di ELMAR a presenta un cas cu tur e aparatonan comun pa mustra cual aparato ta uza e mas coriente y pa promove consumo consciente; e bishitantenan a keda sorprendi cu e resultadonan. E Team di Troubleshooting (miho conoci como Storingsdienst) a informa e clientenan con nan mes por detecta un storing cu ta debi na un fayo dentro di e instalacion di coriente di e cas—informacion hopi valioso.
Un atraccion popular tabata e oportunidad pa subi den e bucket di un truck tecnico y goza di e bista na halto, duna e participante un perspectiva unico den e trabou di e linemen di ELMAR den e Team di Overhead Services. Alabes, e lineman rodeo y competencia di ‘speed climbing’.
E booth di Customer Service, e smart grid di IT, y e booth di Team di (grid) Planning tabata tambe presente pa duna informacion esencial. Ademas, durante e evento, ELMAR a regala premionan di gift cards di coriente na e bishitantenan.
Danki na e F&B station cu EPI tabata encarga cune, nan a logra colecta e fondonan necesario pa nan bishita di estudio. Open Dag tabata un exito total! E tabata un dia di educacion, diversion, y union. Gerencia di ELMAR ta gradici di curason tur esnan cu a bishita, y henter e team di ELMAR cu a contribui pa haci e evento asina memorabel. Keda pendiente pa e Open Dag 2025, cu lo tuma lugar den cuadro di e celebracion di 75 aña di ELMAR – un evento cu bo no lo kier perde!
