ORANJESTAD – Dia Mundial di Parha Migratorio 2024 yama ‘World Migratory Bird Day’ (WMBD), ta observa 2 biaha pa aña. E prome biaha den luna di mei y e otro biaha den luna di october, pa 2024 e ta dia 12 di october. Ta celebra e dos diferente dianan pa enfatisa e migracion di e parhanan cu ta tuma luga riba e hemisferio Noord y riba e hemisferio Zuid. E observacion di dos dia di Dia Mundial di Parha Migratorio tambe ta duna mas hende e oportunidad pa celebra y pa conscientisacion cu ta enfoca riba e necesidad di conservacion di parhanan cu ta migra y nan habitat. E meta ta pa alcansa efectividad di conscientisacion mundial di e retonan cu e parhanan migratorio ta enfrenta, nan importancia ecologico, y e necesidad di cooperacion internacional pa conservacion.
Directie Natuur en Milieu (DNM) tambe ta duna un aporte local pa cu e dia observa aki. Aruba tambe ta ubica strategicamente pa asina grupo di parhanan migratorio bishita nos pa descansa, recarga of tambe broei pa despues nan bolbe nan luga. Den nos publicacionnan recien nos ta enfoca riba nos fauna protegi cu ta inclui parhanan local pero tambe esun-e nan migratorio manera e sternchi chikito y e sternchi pecho roos. DNM ta inclui algun informacion cu ta pertenece na e tema cu ta enfoca e aña aki, cu ta e importancia di insectonan pa e parhanan migratorio.
Tur aña, riba e di dos diasabra di luna di october ta observa e fecha mundial pa parhanan migratorio. E aña aki e tema ta enfoca riba e importancia di insectonan. Insectonan ta un elemento importante pa sobrevivencia di parhanan y esakinan ta menasa mas y mas. Insectonan ta fuente esencial di energia pa parhanan, esaki ta cuminda pa nan. E parhanan tin necesidad di bon nutricion pa nan mes y pa nan yiunan. E presencia di insectonan ta aporta grandemente na e momento di migracion di parhanan. Durante nan parada na diferente luga riba nan ruta, e parhanan ta busca insectonan den mondi, saliñanan of otro habitat. Tambe nan ta busca pa gara insectonan den aire of ta coba pa esakinan den troncon di vegetacion. Hopi biahe of migracion di parhanan ta coincidi cu abundancia di insectonan na e localidad unda nan ta descansa.
Migramento di parhanan ta un fenomeno natural. E biahe aki ta envolve movemento masal di parhanan cu ta bula distancianan largo, cu ta cubri continentenan, guia pa nan instinto, señalnan di medio ambiente, y tambe compaña cu strategia. E migramento di parhanan ta un fenomeno cu ta bou menasa. Esaki ta pavia cu e populacion di insecto ta bahando rapido.
Akinan DNM ta inclui poco mensahenan importante di e interdependencia di insectonan cu e parhanan:
Presencia di insectonan ta influencia e tempo, duracion y exito general pa e migracion di parhanan. Durante e trayecto, parhanan ta para na diferente luga riba nan ruta. Nan ta busca insectonan den areanan di cosecha, mondi, saliñanan, ‘wetlands’ y otro habitat.
Parhanan cu ta come un variedad di insectonan. Esakinan ta inclui abeha, sangura, musca, bichi, barbulet, tor y tambe invertebra acuatico manera e spirito di cabrito (tambe yama dopi dopi). P’esey no ta recomenda pa spuit cu insecticida ki ora cu ta y tampoco unda cu ta. Parhanan cu ta come insecto ta yuda combati infestacion di insectonan of tambe combati plaga cu ta propaga malesa.
85% di matanan cu ta floria ta rekeri polinisacion y esaki hopi biaha ta trabou di insectonan. P’esey si nos perde e polinisantenan nos matanan lo lucha pa biba y tambe e parhanan cu ta depende di nan.
Mantencion y restauracion di areanan cu tin awa manera damnan, saliñanan y ‘wetlands’ ta esencial pa proteccion di e grupo di parhanan acuatico cu ta come insecto.
Observacion y monitoreo di parhanan migratorio cu ta uza ciencia cu ta inclui participacion di hende ta yuda cu conscientisacion. Manera ken no ta corda e conteo nacional di parha, algo asina tambe por haci pa esunnan migratorio. Pa medio di campaña educacional di medio ambiente y naturalesa por duna data importante pa restaura y maneha habitatnan esencial cu ta beneficia y conecta parhanan migratorio.
DNM ta felicita un y tur cu e di dos dia Mundial di Parha Migratorio den 2024.
Ta importante pa reconoce cu mester di mas proteccion no solamente di parhanan pero tambe e insectonan. Bo por admira y reconoce importancia di e parhanan pero mester sa di kico nan ta depende pa nan sobrevivencia; espacio pa biba y tambe loke nan ta come cu ta, insectonan.
