ORANJESTAD – Diabierna mainta durante conferencia di prensa di Gobierno di Aruba, Prome Minister Evelyn Wever-Croes a elabora riba e status di Minister Geoffrey Wever como minister di Gabinete Wever-Croes II, awor cu el a entrega su retiro for di partido RAIZ.
Prome Minister a expresa cu pa su persona e retiro di Minister Wever for di partido RAIZ tabata bisto. Esaki desde e momento cu e parlamentarionan di partido RAIZ a kibra e palabracion cu a wordo haci durante formacion di e coalicion MEP-RAIZ, pa loke ta trata e presidencia di Parlamento.
E mandatario a indica cu pa loke ta e posicion di Minister Wever, el a haya un peticion di partijraad di RAIZ, na unda Minister Wever ta inform’e cu partijraad di RAIZ a pidi’e pa keda como minister. Pa cu esaki, Prome Minister a pidi un declaracion por escrito di e dos parlamentarionan, indicando cu nan ta sostene Geoffrey Wever como minister pa RAIZ, mirando cu e no ta parti di partido RAIZ mas.
Tambe Prome Minister a indica cu na momento cu partido MEP a cera un coalicion cu partido RAIZ, a cera varios acuerdo cu partijraad y lider di partido RAIZ, cu lamentabelmente e dos parlamentarionan no ta tene nan mes na dje. Y ta pa e motibo aki, Prome Minister ta pidi un declaracion por escrito, indicando cu nan ta sostene Minister Wever pa representa nan pa cu e resto di e periodo di gobernacion.
Ta importante si pa menciona cu pa ley si un minister tin sosten di mayoria den Parlamento, e lo por keda minister, irespecto si el a retira di un partido y a join un otro partido, pasobra ta Parlamento tin e ultimo palabra. Den e caso aki si e dos parlamentarionan di RAIZ ta sostene Geoffrey Wever pa keda cu e posicion di minister pa RAIZ, el lo keda como minister.
“Mi no tin motibo pa desconfia den Geoffrey Wever, si mi haya un declaracion cu nan ta sosten’e, nos ta sigui te na final cu ne. Como Minister President mi no tin motibo pa descontinua Minister Wever su posicion di minister, pasobra con cu bay bin economia na Aruba ta bayendo bon, turismo ta bayendo bon y comercio tin confiansa den Gobierno, pues mi no ta kere cu esaki ta momento pa cambia e minister di economia. Pero, na final di dia esaki no ta mi decision. Loke ami como mandatario principal di e pais aki kier, ta trankilidad pa nos por sigui goberna e resto di e periodo aki”, Prome Minister a expresa.