Partido MEP ta gradici tur esnan cu a sostene nos partido den e eleccion di diabierna ultimo.
Como muestra di nos aprecio y gratitud na e pueblo sostenedor di nos partido, diadomingo 24, nos a sali den un parada cu nos a yama “E Parada pa Cambio” saliendo di San Nicolas, pasa den Santa Cruz, Paradera, Noord, Oranjestad pa despues nos yega na nos Cede na Santa Cruz unda nos tawata tin un “happy hour” prepara cu animacion di Robert Jeandor y su Solo Banda Show.
Candidatonan di MEP tawata hunto riba un trailer na unda tawata reina un ambiente di union y alegria grandi demostrando cu integrantenan di MEP ta mas uni cu nunca y ta cla pa asumi nan responsabilidad den e proximo 4 añanan nos dilanti.
E recibimento di pueblo na nos parada tawata inmensamente grandi demostra tanto den e parada sumamente largo como tambe banda di caminda, na unda tanto nos hendenan y esnan di otro partidonan a sali y a duna nos un saludo di sosten, gradicimento y pa felicita nos.
“Cu e parada aki, nos a celebra democracia y respet pa pueblo. Nos a celebra gratitud. Nos a celebra e cambio cu pueblo a vota p’e. Pesey nos a pasa den tur bario pa gradici tur esnan cu a sostene nos. Den e eleccion aki, Partido MEP a crece cu 5 mil voto y cu 2 asiento extra den Parlamento. Esaki ta algo cu ta haci nos hopi contento. Nos compromiso cu e pueblo ta pa rescata e pais aki y libere di e pio gobierno cu nos a conoce y esaki keto bay ta nos mision.
Danki di curason pa deposita bo confiansa den partido Movimiento Electoral di Pueblo pa yuda nos carga nos vision y e mensahe di speransa pa Aruba”, tawata e palabranan di Lider di MEP, sra Evelyn Wever-Croes.