Aruba Tourism Authority (A.T.A.) cu aporte importante na e industria Cultural y Creativo na Aruba
‘Cu sosten na conferencia CreActivo hunto cu Go Cultura Foundation’
Aruba Tourism Authority (A.T.A.) como patrocinio principal di CreActivo, a provee sosten na Go Cultura Foundation pa crea un conferencia caminda a sirbi como un plataforma pa uni miembronan den di e industria creativo. Pero tambe pa completa metanan y estudionan clave.
A.T.A. ta kere firmemente den aloca fondonan necesario como empuhe pa yuda guia e industria creativo segun esfuersonan colectivo. Durante di e conferencia, CEO di A.T.A. Ronella Croes, a reconoce cu cada industria ta enfrenta desafionan, y e industria di turismo no ta un excepcion, y con data y investigacion ta yuda pa guia e industria den un era nobo. Mescos cu e industria di turismo, e ta keda crucial pa captura data y aplica hecho y conocemento den e industria creativo, cu lo yuda na provee sosten solido pa e iniciativa di e Industria Cultural y Creativo.
E sosten di A.T.A. ta inclui esfuerso, hunto cu Go Cultura Foundation, pa colecta y analiza data pa mapa e Industrianan Cultural y Creativo di Aruba. Esaki ta un paso significativo pa dilanti. Cu esaki, nos por identifica cual area di e economia creativota florece y unda mas atencion ta necesario. E lo permiti nos pa ahusta nos estrategia di desaroyo basa riba evidencia fuerte, asegurando cu nos ta invertí caminda e impacto lo ta mas grandi. Na termino largo, e crecemento di e sector creativo, prueba pa dato, lo enrikese e paisahe cultural di Aruba y contribui na un turismo sostenibel y desaroyo economico. Poniendo enfasis riba e importancia di preserva nos cultura y cuida e talento local, ta importante pa recorda riba e impacto profundo cu creatividad y autenticidad tin riba e identidad di un comunidad.
Alabes, a conta cu presentacion di Senior Product Specialist di A.T.A. Derchlien Dijkhoff, cu a presenta e importanica y vision di cada proyecto. Proyectonan y iniciativa di ‘Destination Enhancement’ diseña pa crea un balans entre e necesidadnan actual y futuro di nos residente, mientras ta mehora e experiencia di e huespednan y ta stimula interaccion entre e localnan y e huespednan. Nos esfuersonan ta enfoca hopi riba promove y crea experienciananeducativo cu ta resalta nos cultura, e proteccion di nos flora y fauna, y tambe door di apoya y demostra experiencianan autentico.
E trabou di e industria creativo no ta solamente un parti di e experiencia turistico, sino e centro di esaki. Nos cultura y identidad ta parti di loke ta separa Aruba di otro destinacion. A.T.A. ta mira un papel crucial den proteha y comparti e autenticidad di Aruba door di empodera y inclui comunidadnan local na un manera signicativo. Atraves di iniciativanan of medio di gran sosten di A.T.A., a percura pa sostene eventonan nobo, manera Autentico Aruba Culinary Festival cu ta tuma lugar e siman aki, e evento di Aruba Art Fair, Bon Bini Festival, nos manifestacion cultural di mas grandi, esta nos Carnaval, cu sosten na Dia di Brazil organisa pa Fundacion Chico Harms, y Aruba Signature Experience Entrepreneurial Program cu ta stimula y duna apoyo na empresanan nobo cu ta tuma aventura den niche di cultura, bienestar y boda. Banda di esaki, A.T.A. ta traha di cerca cu artesanonan local y talento local pa refina nan arte y crece profesionalmente. Sin laga afo, e cantidad di talentonan creativo cu diariamente ta sostene A.T.A. For di fotografonan, videografonan, diseñadornan, creador di contenico, te cu productor di historia. Cu exhibícion di talento local di Aruba, A.T.A.orguyosamente ta hiba nos talentonan riba plataforma internacional. For di exhibicion di arte, presentacion na evento di musica global, y di e mundo culinario, pa menciona algun.
E conferencia a conta cu diferente orador local y internacional cu a aporta inmensamente na e contenido y informacion clave cu a ser comparti.
A.T.A. ta gradici y felicita Go Cultura Foundation pa un bunita iniciativa dirigi na e comunidad creativo di Aruba.