Madiki – Diamars anochi den careda di 8’or pasa polis a bay unda antes tawata Las Caleñas, situa banda di Driemasterstraat.
Eynan lo tawata tin un situacion unda un homber lo tawata tin un cuchiu den man y lo ta un peliger.
Berdad na yegada di polis, nan a bin topa cu e homber aki cu e cuchiu; un situacion basta peligroso.
E agentenan cu ta 2, no a pensa dos biaha y a pidi refuerso di mas colega cu a sa di yega mesora.
A papia y a papia cu e homber, pero esaki no tawata worry cu nada locual polis tawata bis’e. No a keda nada otro pa pidi pa e team tactico di polis cu ta RRT(Rapidresponder Team).
Despues casi mey ora e team a yega y nan a para tegenover di e homber y a keda papia cu ne. Pero tampoco e tawata worry.
Nan a usa un sorto “bom” pa a distrae e homber cu tawata tin un cuchiu grandi den su man drechi. Ora cu esaki a explota, nan a usa bala di rubber y a asina a drenta e homber y pone ariba vloer.
Na e sitio, nos a compronde cu e homber aki un rato prome lo a haya un discusion serio cu su tata; y parse cu e tata lo a dal’e varios biaha cu palo.
Posiblemente di rabia e lo a pasa man pa un cuchiu y lo tawata dispuesto pa haci algo.
E homber a wordo transporta pa warda, unda eynan lo bay saca afor kiko tur ta pasando; y si e lo mester papia cu slachtofferhulp pa asina haya e ayudo cu e mester.
