Watty Vos Boulevard – Diamars mainta den careda di 8’or pasa a ta sosode un accidente frontal no comun; altura di Kooyman.
Mesora polis a yega y berdad ta topa dos auto pega contra otro, y cu dos hende herida.
Tawata trata di un Nissan March y un Isuzu pickup. Un poco mas panort, por a mira un truck di DOW.
LOCUAL A SOSODE
E accidente aki a sosode net na e entrada di caminda grandi, pabo drenta pa bay Kooyman.
Un dama na stuur di e March a dicidi di sali di eynan, pa e bay pazuid o sea pa e bay direccion rotonde Wayaca.
Chauffeur di e truck di DOW di leu a mira kiko tawata pasando, y cera brake y desvia. E truck tawata bashi; si e tawata carga lo tawata tin un otro resultado.
Na stuur di e Isuzu e chauffeur lo no a spera di topa cu un spookrijder ariba su liña, y dal frontal contra e March.
Chauffeur di e March a resulta herida; pero por a mira cu tawata na tino y tawata tapa su cara cu su mannan.
Dos ambulance a presenta na e sitio. Ambos heridos no a mustra señalnan di golpi serio na curpa.
Polis di trafico a presenta y a haci su investigacion, mientras cu rotonde Wayaca a wordo cera pa trafico durante esaki y alabes Paramediconan tawata bezig memey caminda.
Kiko por a drenta e dama su cabes pa haci esaki no ta duidelijk.
