Un bunita reconocimento pa e Plataforma digital inovativo Coleccion Aruba
Minister Xiomara Maduro ta informa cu dialuna, 7 di october 2024, Internet Archive a anuncia Aruba como e ganador di e premio anual Internet Archive Hero Award. Internet Archive ta reconoce cu e premio aki e trabounan di e Plataforma digital inovativo Coleccion Aruba.
Internet Archive ta un biblioteca digital gratis cu ta archiva documentonan di World Wide Web y ta haci esakinan universalmente acesibel pa tur hende na tur parti di mundo. E ta un di e bibliotecanan digital mas grandi y mas significante mundialmente y ta contene un variedad amplio di informacion y material manera buki, website, video, musica y hopi mas.
Tur aña Internet Archive ta otorga un prestigioso premio ‘Internet Archive Hero Award’ na esnan cu a demostra liderato excepcional den haci informacion disponibel digitalmente rond mundo. Internet Archive a reconoce e esfuersonan inovativo di Aruba den pone su herencia cultural online via Coleccion Aruba y a nombra Pais Aruba como e ganador di e ‘Internet Archive Hero Award’ e aña aki.
Coleccion.aw ta un plataforma cu ta brinda e usuario informacion tocante nos historia y cultura. E ta un inovacion unico na Aruba y den nos region. Un plataforma digital cu Biblioteca Nacional Aruba, Archivo Nacional Aruba, UNOCA, Museo Arkeologico Nacional Aruba, Stichting Monumentenfonds, Plantage Zorg en Hoop y demas organisacionnan gubernamental y no-gubernamental a uni for a pa crea e Coleccion Aruba.
Minister di Cultura na nomber di Aruba ta gradici Internet Archive pa e gran honor di reconoce e trabou duro y esfuerso di nos Pais pa preserva y pone accesibel nos herencia cultural atraves di e Plataforma digital di Coleccion Aruba. “E premio aki ta un gran estimulo pa sigui traha riba preservacion di nos cultura y historia. Danki pa sostene nos esfuerso pa mantene nos rikesa cultural bibu y accesibel pa futuro generacionnan.”
Minister Xiomara Maduro ta yama danki na tur e profesionalnan cu a traha duro pa e proyecto di Coleccion Aruba. E reconocimento aki ta danki na trabou duro y esfuersonan di nos profesionalnan. E mandatario ta gradici tambe tur e partnernan di Coleccion Aruba y ta yama un danki special na Setar NV cu for di inicio a coopera cu e proyecto aki.
Pronto Minister di Cultura hunto cu representantenan di Bibioteca Nacional Aruba y Archivo Nacional Aruba lo ta presente na e celebracion di Internet Archive na San Francisco, California pa ricibi e prestigioso premio di Internet Archive Hero Award.
Por lesa e anuncio cu Aruba ta Ganado di e Internet Archive Hero Award riba https://blog.archive.org/2024/10/07/aruba-to-receive-2024-internet-archive-hero-award-for-groundbreaking-digital-heritage-initiatives/ y tambe https://x.com/internetarchive/status/1843305852310360320
Pabien Aruba, cu e bunita reconocimento aki.
