Oranjestad, Aruba – 2 di oktober 2024 –Aruba Bank ta orguyoso di anuncia un compromiso di tres aña como e patrocinador bancario di e evento “Ride for the Roses,” organisa pa One Happy Bike Island Foundation (OHBI) pa sostene Koningin Wilhelmina Fonds (KWF). E conferencia di prensa pa anuncia e alianza aki a tuma lugar awe mainta na Aruba Bank.
E evento “Ride for the Roses,” programa pa tuma lugar dia 3 di November 2024, ta enfoca pa crece e conscientisacion, recauda fondo pa combati Cancer y pa duna sosten vital na pashentnan y nan famianan na Aruba. E evento lo conta cu diferente actividadnan di deporte, manera caminata, coremento, ciclismo, y natacion, y lo tuma lugar dilanti Amsterdam manor na Eagle Beach. Aruba Bank su compromiso financiero y alianza strategico lo contribui pa yuda e pashentnan di Cancer via KWF directamente.
“Nos ta honra pa colabora cu One Happy Bike Island Foundation pa sostene e ‘Ride for the Roses,” di Koningin Wilhelmina Fonds, segun Tamara Waldron, Regional Marketing and Branding Manager, a bisa. “E compromiso aki ta alinea cu nos balornan y nos dedicacion pa sostene iniciativa di salud riba nos isla. Nos compromiso ta pa haci un impacto positivo den nos comunidad, y atravez di e alianza aki, nos ta spera pa trece conscientisacion y apoyo pa esnan cu ta sufri di Cancer na Aruba y nan famia.”
Representando e fundacionnan organisador na e conferencia di prensa tabata Jurgen van Schaijk-Amsterdam Manor, Hilde Rodriguez-Taekema y Paul Cremers-Tri-Bike Aruba, cu ta instrumental den e iniciativa importante aki.
Atravez di e partnership aki, Aruba Bank ta aspira no solamente pa yuda den e lucha contra Cancer, pero tambe pa amplia su rol como un organisacion cu ta asumi responsabilidad social. Aruba Bank ta hopi contento pa participa activamente den e evento di “Ride for the Roses” y pa traha hunto cu KWF y OHBI pa logra un impacto positivo y duradero riba e bida di esnan na Aruba.