ORANJESTAD – Diabierna mainta e homber Bryan Jimenez(28) y e dama Jennifer Gonzalez (39) a presenta den Corte pa scucha nan sentencia.
ARUBA NATIVE por a compronde cu Hues a baha e castigo exigi pa Fiscal, kende a exigi 18 aña pa Bryan Jimenez y 20 aña pa Jennifer Gonzalez.
HOMBER CULPABEL
Hues a cuminsa cu Bryan y a bisa cu Bryan ta culpable di asesinato cruel di Sergio Maduro riba 24 December 2023. Hues a bisa cu Bryan a admiti di a asesina Sergio y cu ta Jennifer a bis’e pa asesina Sergio.
Hues a bisa cu esaki ta un caso hopi serio y comunidad ta exigi pa duna castigo pisa. Hues a bisa cu pa cu e castigo mester tene cuenta cu diferente factor entre otro raport di psychiater. Psychiater ta haya Bryan menos responsabel pa loke el a haci y ta recomenda pa despues di castigo di prison, Bryan haya tratamento na Respaldo. Psycologo ta haya cu Bryan tambe tin un tipo di problema mental. Psycologo tambe ta conseha tratamento despues di castigo sinta y esaki bou guia Reclasering.
NENGA TRATAMENTO OBLIGATORIO
Hues a bisa cu den su decision e ta sigui e pensamento di Psychiater y Psycologo esta cu Bryan ta menos responsabel. Sinembargo Hues a bisa cu e no ta sigui e conseho pa pone Bryan bou tratamento obligatorio TBS. Hues a splica cu segun ley, TBS ta posibel pa castigo te maximo 6 aña di prison. Den e caso aki e castigo ta mucho mas halto.
DAMA NO A DUNA CLARIDAD DI E CASO
Pa Jennifer, Hues ta hay’e culpable di a provoca asesinato di Sergio y a haci promesa di paga. Hues a bisa cu Jennifer a keda nenga pero cu Bryan a admiti di a asesina Sergio door di necesidad di placa y cu Jennifer a priminti pago. Bryan a pidi 2 mil florin y Jennifer a bay di acuerdo. Jennifer a paga 150 florin adelanta y a palabra cu despues di e asesinato Bryan lo haya e resto. Hues a mustra cu for di declaracion di Bryan por compronde cu Jennifer tabata kier prueba di e asesinato di Sergio promer cu e paga. Hues a mustra riba un cantidad di prueba entre otro cu Jennifer a bisa na diferente hende cu e kier mata Sergio pasobra e ta fada di e abusonan di Sergio.
Pa cu e castigo, Hues a bisa cu e ta tene cuenta cu Jennifer no kier a duna claridad riba e caso y tampoco Jennifer a mustra duele di loke el a haci. Hues a sigui bisa cu Psycologo a mustra cu Jennifer tin problema cu no por controla su emocionnan. Psycologo ta haya cu Jennifer ta menos responsabel pa su actonan y cu Jennifer mester haya guia di Reclasering.
CASTIGO
Hues a condena Bryan na 17 aña di prison y Jennifer na 18 aña di prison.