Aña pasa a inicia un proceso den cuadro di e Landspakket pa sondea ki accionnan adicional por añadi pa logra reformanan economico di un manera mas completo. Pa Minister Geoffrey Wever e ta importante pa locual Aruba acorda yuda avansa e implementacion di e vision y maneho economico di Aruba. Pa es motibo, e mandatario a traha un nota pa Hulanda indicando e vision economico, e areanan y proyectonan di e maneho economico actual di Ministerio di Asuntonan Economico.
E impacto cu ta desea di logra cu ‘partnership’ aki cu a keda aproba den conseho di minister di Aruba, ta pa stimula un desaroyo economico inclusivo y sostenibel. Abase di e nota aki diferente combersacionnan a tuma luga entre Aruba y Hulanda unda cu a cera un acuerdo di asistencia tecnico y/of ayudo financiero riba varios area.
E areanan cu lo enfoca riba dje: 1. Haci e clima empresarial mas accesibel y atractivo pa empresarionan local como tambe inversionista; 2. Mehora comercio den region; 3. Crea un ambiente laboral y di vivienda pa Oranjestad y San Nicolas; 4. Mas seguridad di alimento; 5. Un maneho economico basa riba datos y cu ta considera e capacidad di e isla.
Pa cu esaki, lo traha concretamente cu Hulanda riba aspectonan manera: Optimalisa e procesonan di permiso y di suministro di informacion; Mehoracion di proteccion di consumidor; Mehora acceso na capital pa inversionistanan; Mehoracion di comercio entre islanan ABC y otro mercadonan manera Colombia y Surinam; Plan di desaroyo economico pa centro di Oranjestad y San Nicolas; Maneho di industria creativo “Orange Economy”; Sondea cual ta e tipo di ‘greenhouses’ mas ideal, cultivonan mas prometedor y sondeo di metodonan di cultivo pa Aruba.
Den cuadro di traha un ‘Agri Innovation Park’ lo desaroya tambe un modelo financiero, modelo di exploitacion, modelo di organisacion, diseño tecnico, un analisis di mercado y un estudio di factibilidad. Adicionalmente, lo determina e liña di pobresa pa Aruba y zorg pa e ‘national accounts’ di pais Aruba ta actualisa.
Minister Geoffrey Wever ta satisfecho cu e colaboracion cu Hulanda den cuadro di e Landspakket. Pues, banda di e ayudo ricibi for di Hulanda pa avansa areanan di maneho economico, e Landspakket ta zorg tambe pa tin un structura di continuidad cu ta esencial pa logra cambionan pa progreso sostenibel di un pais.
“Den gobernacion ta importante pa delinea un maneho cu ta al caso, cu por wordo implementa y cu ta conta cu un partnership strategico. Un plan no mester djis keda den lachi. Despues di haci e trabou grandi di traha un plan mester haci e trabou grandi tambe pa haya partnerships clave cu por yuda realisa e plannan aki.”, asina Minister Geoffrey Wever a expresa.